बागलुङको निसीखोला गाउँपालिका– ३, बोहोरागाउँमा सडक स्तरोन्नतिको क्रममा माटोको ढिस्को खस्दा पुरिएर दुई मजदुरको मृत्यु भएको छ । घटनामा एक मजदुर गम्भीर घाइते भएका छन् ।
सोमबार बिहान करिब ७:२० बजे झिवाखोलाबाट बोहोरागाउँ जाने भित्री सडकखण्डमा लु.१क ३४४६ नम्बरको जेसिबीले सडक खन्ने क्रममा अचानक माथिबाट माटोको ढिस्को खसेको थियो । ढिस्कोमा पुरिएर सल्यानका ३२ वर्षीय लालबहादुर बुढाथोकी र उदयपुरको गाईघाटका ३२ वर्षीय राजु थापामगरको मृत्यु भएको हो ।
दुवैजनालाई माटोको ढिस्कोमा पुरिएको अवस्थामा उद्धार गरिएको थियो । घटनामा रोल्पाको त्रिवेणी गाउँपालिका– ५ का २५ वर्षीय कृष्णबहादुर घर्ती गम्भीर घाइते भएका छन् । उनको उद्धार गरी उपचारका लागि बुर्तीबाङ अस्पताल पठाइएको छ । घटनाबारे थप विवरण आउन बाँकी रहेको प्रहरीले जनाएको छ ।
