चक्रपथको बल्खुबाट कलंकीतर्फ जाँदै गर्दा सीता पेट्रोलपम्पनजिकै सर्भिस लेनमा ट्रकसहितका सवारीसाधन लहरै पार्किङ गरिएका देखिन्छन् । मुख्य सडकमा गाडी गुडे पनि सर्भिस लेनको ५२५ मिटर भने निर्माण थालेको साढे तीन वर्षसम्म अधुरै छ ।
काठमाडौं उपत्यका सडक विस्तार आयोजनाका साइट इन्जिनियर रामकुमार श्रेष्ठका अनुसार १५ फागुन ०८१ मा निर्माण सम्झौता भएकामा हालसम्म भौतिक प्रगति ४५% मात्र छ । गुराँस–साइटेक जेभीलाई यसअघि १५ असार ०८३ सम्मका लागि म्याद थप भएको थियो । फेरि एक महिनाका लागि म्याद थपको तयारी छ ।
‘प्लम वाल, सेयरवाल, फुटपाथ, मेनहोल र ह्युमपाइप निर्माणको काम सकिसकेको छ,’ श्रेष्ठले भने, ‘अब सडक ढलान र कालोपत्रको काम मात्र बाँकी छ । संशोधित सार्वजनिक खरिद ऐनअनुसार ठेक्काको म्याद थपको प्रक्रिया अगाडि बढेको छ ।’ विद्युत्का पोल हटाउन, वर्षा र मध्यपूर्वको युद्धले महँगी बढ्दा ढिलाइ भएको उनले बताए ।
पाँच करोड ६ लाख लागत सम्झौता भएकामा भेरियसन भएर पाँच करोड ३० लाख पुगेको छ । योमध्ये ४२.४% रकम भुक्तानी भइसकेको छ । चीनले चक्रपथको कोटेश्वरदेखि कलंकीसम्म १०.४ किलोमिटर अनुदानमा निर्माण गरेर ०७५ मा हस्तान्तरण गरेको थियो ।
