शनिबार राति आएको अविरल वर्षाको कारण साँफे–मार्तडी सडकखण्ड आइतबार बिहानदेखि पूर्ण रूपमा अवरुद्ध भएको छ। यो सदरमुकाम मार्तडी र जिल्लाको उत्तरपूर्वी भागमा पर्ने चारवटा स्थानीय तह तथा छिमेकी जिल्ला मुगु, हुम्ला, जुम्ला र कालीकोट जाने मुख्य राजमार्ग हो।
शनिबार राति लगातार परेको वर्षाका कारण बडीमालिका नगरपालिका– ९ स्थित कारागार मोड, विनोद स्मृति प्रतीक्षालय, सेलागाड, सुवाकाँधलगायतका स्थानमा सडकमाथिबाट पहिरो खसेको छ।
यस्तै बडीमालिका– ८ को राप्का र वडा नं ६ को जडांगालगायतका स्थानमा समेत पहिरो खसेको जिल्ला प्रहरी कार्यालय बाजुराका सूचना अधिकारी नरेश शाहीले जानकारी दिए।
सडक अवरुद्ध भएपछि आइतबार बिहानदेखि नै बडीमालिका नगरपालिकालगायत अन्य सरोकारवाला निकायहरूले सडक खुलाउन पहल गरिरहेको भए पनि सडक नियमित हुन सकेको छैन।
