एमालेमा युवा सुहाङलाई रोकेर ७० वर्षका बादललाई बनाइयो दलको नेता

इलाम २ बाट दोस्रोपटक प्रत्यक्ष जित निकालेर सांसद भएका युवा सुहाङ नेम्वाङलाई ‘आन्तरिक प्रतिस्पर्धा’मै रोकेर एमालेले समानुपातिक सांसद रहेका उपाध्यक्ष रामबहादुर थापा बादललाई संसदीय दलको नेता चयन गरेको छ । एमालेभित्र ४० वर्षमुनिका युवा सुहाङलाई दलको नेता बनाउनुपर्ने मत उठेकै वेला शीर्ष नेताहरूले उनलाई पन्छाएर ७० वर्षीय बादललाई संसदीय मोर्चाको कमान्डर बनाएका हुन् ।

दलको नेताका लागि उम्मेदवार मनोनयन फारम लगेका नेम्वाङ शीर्ष नेताहरूको हस्तक्षेप भएपछि पछाडि हटेका हुन् । अध्यक्ष केपी ओलीसहित उपाध्यक्षहरू विष्णु पौडेल, पृथ्वीसुब्बा गुरुङ, महासचिव शंकर पोखरेलसहितका नेताहरू बादललाई दलको नेता बनाउने पक्षमा रहेको जानकारी पाएपछि नेम्वाङले उम्मेदवारी दर्ता गराएनन् । सर्वसम्मत नेता चयनका लागि सहयोग गरेका थिए । 

बैठक सुरु भएपछि सांसद सुहाङले दलको नेतामा उम्मेदवारी दिने प्रस्ताव सुनाएका थिए । त्यसका लागि उनलाई धनकुटाबाट निर्वाचित सांसद राजेन्द्र राई र संखुवासभाबाट निर्वाचित सांसद डा. अर्जुन कार्कीले प्रस्तावक र समर्थक बसेर सहयोग गर्ने वचन दिएका थिए । सुरुमा सहयोग गर्ने वचन दिएका कार्की उम्मेदवारी दर्ता गर्ने वेला खुलेनन् । उनले उम्मेदवारी मनोनयनको समर्थकका रूपमा हस्ताक्षर गरेर नेतृत्वको चाहनाविरुद्ध जोखिम मोल्न पनि चाहेनन् । 

धनकुटाबाट प्रतिनिधित्व गर्ने सांसद राईले सुहाङलाई उम्मेदवारी दिन सहयोग गर्नेबारे सल्लाह भए पनि बैठकमा सबै सांसदहरूले सर्वसम्मतिकै पक्षमा धारणा राखेकाले पार्टीले अन्तिममा सबैको भावना बुझेरै तदनुरूपको निर्णय लिएको बताए । ‘उम्मेदवारीबारे सल्लाह गरेको हो । तर, छलफल हुँदै जाँदा सबै सांसदहरूले सर्वसम्मत गरेर जाँदा नै उपयुक्त हुन्छ भन्ने राय आएपछि त्यसअनुसार नै उम्मेदवारी पर्यो र सर्वसम्मत निर्णय भयो । चुनावी प्रतिस्पर्धा नभए पनि चुनावी वातावरणसम्म बनाइयो, तर निर्णय गर्ने वेला सर्वसम्मतितिर नै गयो,’ राईले भने । 

सुहाङले आफ्नो चाहना राखेपछि उपाध्यक्ष बादलले पनि आफ्नो प्रस्ताव राखेर सहयोगका लागि आग्रह गरेका थिए । केहीबेर छलफलको क्रममा सहमति जुट्ने स्थिति नबनेपछि उपाध्यक्षद्वय पौडेल र गुरुङ तथा महासचिव शंकर पोखरेलकै प्रस्तावअनुसार चुनावी प्रक्रिया अगाडि बढाइएको थियो । महासचिव पोखरेलले त सुहाङका लागि नेतृत्व विकासका लागि अझै ठाउँ रहेको बताएर दलभित्रै पनि महŒवपूर्ण जिम्मेवारी दिन सकिने संकेत गरेर सहयोगका लागि आग्रह गरेका थिए । तर, त्यसबिचमै प्रस्तावक र समर्थक सांसदहरूले सहयोग गर्न तयार नभएको देखिएपछि दबाबमा परेका नेम्वाङ पनि पछि हटेका थिए । 

निर्वाचन समितिका संयोजक एमाले केन्द्रीय सदस्य नीरज आचार्यले एउटा मात्र उम्मेदवारी परेपछि सर्वसम्मत नेता चयन भएको बताए । ‘उम्मेदवारीमा दाबी गर्नुभएका दुवैले मनोनयन फारम लैजानुभएको थियो । तर, बादलले मात्र उम्मेदवारी दर्ता गराउनुभयो । सुहाङजीले मनोनयनको समय गुज्रिएपछि निर्वाचन प्रक्रिया अगाडि बढाउँदा हुन्छ भन्ने जानकारी गराउनुभयो,’ आचार्यले भने, ‘त्यसपछि एकजनाको मात्र उम्मेदवारी परेकाले चुनावी प्रक्रियाअनुसार सर्वसम्मत दलको नेता चयनको प्रक्रिया सम्पन्न भयो ।’ चुनावलगत्तै नेम्वाङले बादललाई बधाई दिएका थिए । पहिले पनि समानुपातिक सांसद भइसकेका बादललाई यसपटक पुनः त्यहीँबाट सांसद बनाइएकोमा आलोचना हुँदै आएको थियो । 

नेम्वाङलाई नेता नबनाइएपछि एमालेको संस्थापन पक्षमै रहेका नेता तथा युवा पुस्ताका थुप्रै कार्यकर्ताले नेतृत्वको आलोचना गरेका छन् । उपमहासचिव योगेश भट्टराईले सांसदहरूलाई दबाबमा राखेर दलको नेता चयन गरिएको टिप्पणी गरेका छन् । ‘निर्वाचनबाट पार्टीलाई गम्भीर धक्का लागेको, पार्टी र नेतृत्वप्रति व्यापक जनगुनासो रहेको, पार्टी अध्यक्ष स्वयं गिरफ्तारीमा पर्नुभएको, समग्रमा हाम्रो आन्दोलनले बहुआयामिक प्रतिकूलताको सामना गरिरहेको वर्तमान अवस्थामा नेकपा एमालेको व्यापक पुनर्गठनमार्फत बलियो एकता बनाउँदै जनविश्वास जागृत गर्नुपर्ने वेलामा आज नेकपा एमालेको संसदीय दलको नेता छान्न जुन तरिका र शैली अपनाइयो यसबाट सिंगो पार्टीपंक्तिलाई थप चिन्तित बनाएको छ,’ भट्टराईले भनेका छन्, ‘केही दिनको समय लिएर पार्टी नेतृत्व र माननीय सांसदहरूका बिचमा छलफलका माध्यमबाट उच्चस्तरको समझदारीमा पुग्नुको सट्टा सांसदहरूलाई दबाबमा राखेर जे गरियो यो राम्रो भएन ।’

दलको नेता चयनपछि नेम्वाङले इच्छा जाहेर गरे पनि हुन नपाएकोमा हतोत्साहित नभएको प्रतिक्रिया दिए । ‘एमालेमा रहेका कमजोरी सुधार्ने र भविष्यमा एमाले अझ सुदृढ भएर बढ्नुपर्छ भनेर पाइला चालेको हुँ,’ नेम्वाङले भने, ‘पाइला चाल्दा कहिलेकाहीँ अपेक्षित परिणाम प्राप्त नहुन सक्छ, तर हतोत्साहित हुनुहुँदैन । एमालेले निरन्तर देशलाई समृद्धितिर लैजान्छ । सौम्य र सभ्य तरिकाले देश र जनताको पक्षमा कुरा उठाइरहन्छ ।’

संसद्को पहिलो बैठकमा एमालेले ओली पक्राउको विरोध गर्ने, तर सदन अवरोध नगर्ने 
एमालेले बिहीबार बस्ने संसद्को पहिलो बैठकमा पार्टी अध्यक्ष केपी ओलीलाई प्रतिशोध साधेर गिरफ्तार गरिएको भन्दै संसद्मार्फत सरकारको गम्भीर ध्यानाकर्षण गराउने भएको छ । नवनिर्वाचित दलका नेता बादलले अध्यक्ष ओलीको गैरकानुनी गिरफ्तारीबारे प्रश्न उठाएर पक्राउको कारण र निःसर्त रिहाइको माग गरिने बताए । ‘पहिलो बैठकमा परिचय र बधाई कार्यक्रमको मात्रै एजेन्डा छ । त्यसैले सदन अवरोध गर्दैनौँ । तर, सदनमा अध्यक्षको गिरफ्तारीविरुद्ध आवाजहरू उठाउँछौँ, सरकारलाई कारण सोध्छौँ र रिहाइको ध्यानाकर्षण गराउँछौँ,’ उनले भने । दलको बैठकले सांसदहरूका लागि २१ फागुनमा अभिमुखीकरण आयोजना गर्ने निर्णय लिएको छ । 

प्रमुख प्रतिपक्ष कांग्रेसले बिहीबार दलको नेता छान्ने 
आन्तरिक विवादमा रुमल्लिएको प्रमुख प्रतिपक्षी दल कांग्रेसले बिहीबार मात्रै संसदीय दलको नेताको टुंगो लगाउने भएको छ । बिहीबार संसद् बैठकअघि बिहान दलको बैठकमार्फत नेता चयनबारे छलफलको तयारी गर्ने तयारी रहेको प्रवक्ता देवराज चालिसेले बताए । ‘दलको नेता चयनका विषयमा छलफल गर्न बिहीबार बिहान बैठक बोलाएका छौँ । कसलाई बनाउने त्यहीँ छलफल हुन्छ,’ चालिसेले भने । कांग्रेसभित्र गगन थापा नेतृत्वको संस्थापन पक्षविरुद्ध तत्कालीन सभापति शेरबहादुर देउवा पक्षले कार्यवाहक सभापति पूर्णबहादुर खड्काको नेतृत्वमा समानान्तर गतिविधि सक्रिय बनाइरहेको छ । दलको नेतामा पनि देउवा पक्षले अलग उम्मेदवारी दिने तयारी गरेको छ । 

सुहाङलाई रोकिएपछि उपमहासचिव योगेश भट्टराईको टिप्पणी
...एमालेको व्यापक पुनर्गठनमार्फत बलियो एकता बनाउँदै जनविश्वास जागृत गर्नुपर्ने वेलामा संसदीय दलको नेता छान्न जुन तरिका र शैली अपनाइयो यसबाट सिंगो पार्टीपंक्तिलाई थप चिन्तित बनाएको छ । केही दिनको समय लिएर पार्टी नेतृत्व र माननीय सांसदहरूका बिचमा छलफलका माध्यमबाट उच्चस्तरको समझदारीमा पुग्नुको सट्टा सांसदहरूलाई दबाबमा राखेर जे गरियो यो राम्रो भएन ।