११ पुसमा बयान दिन आउन रमेश लेखकलाई जाँचबुझ आयोगको पत्र

जेन–जी आन्दोलनमा भएको मानवीय तथा भौतिक क्षतिको छानबिन गर्न गठन भएको जाँचबुझ आयोगले तत्कालीन गृहमन्त्री रमेश लेखकलाई बयानमा बोलाएको छ । आयोगले लेखकलाई मंगलबार पत्राचार गर्दै ११ पुसमा बयानका लागि बोलाएको हो । 

२३ भदौको जेन–जी आन्दोलनमा घातक हतियारबाट गोली चलाएर दमन हुँदा लेखक गृहमन्त्री थिए । बानेश्वर क्षेत्रमा मात्रै १७ जनाको ज्यान गएको थियो भने एक सयभन्दा धेरै घाइते भएका थिए । सो घटनाको नैतिक जिम्मेवारी लिँदै लेखकले सोही दिन बेलुका राजीनामा दिएका थिए । 

आयोग स्रोतका अनुसार मंगलबारै लेखकका एक सहयोगीले बयानसम्बन्धी पत्र बुझेका छन् । बयानमा जाने कि नजाने भन्नेमा लेखक छलफलमा छन् । तत्कालीन प्रधानमन्त्री तथा एमाले अध्यक्ष केपी ओलीले बयानमा नजान लेखकलाई दबाब दिइरहेका छन् । 

आयोगले तत्कालीन गृहसचिव गोकर्णमणि दुवाडी, प्रहरी महानिरीक्षक चन्द्रकुबेर खापुङलगायतसँग बयान लिइसकेको छ । बयान सकिएपछि उनीहरूको स्थानहद पनि मंगलबारदेखि नै फुकुवा गरेको छ । ओली र लेखकको पनि बयान सकिएपछि स्थानहद फुकुवा गर्ने आयोगको तयारी छ । 

आइतबार बसेको आयोगको बैठकले ओली र लेखकसँग बयान लिने निर्णय गरेको थियो । सुरुमा लेखकसँग बयान लिने र उनको बयानको आधारमा ओलीलाई पत्र लेख्ने आयोगको तयारी छ । 

२३ र २४ भदौमा भएको मानवीय तथा भौतिक क्षतिको विषयमा छानबिन गर्न सरकारले पूर्वन्यायाधीश गौरीबहादुर कार्कीको अध्यक्षतामा आयोग गठन गरेको हो । आयोगले तीन महिना अवधि पूरा गरिसकेको छ । सो अवधिभित्र छानबिन नसकिएपछि एक महिना थप गरिएको छ । थपिएको अवधिभित्र प्रतिवेदन बुझाउने गरी काम भइरहेको आयोगका प्रवक्ता विज्ञानराज शर्मा बताउँछन् ।

रघुवीरको टिप्पणीप्रति जाँचबुझ आयोगको ध्यानाकर्षण

• नेताहरूलाई झुन्ड्याउनुपर्छ, मार्नुपर्छ भनेको छैन, एकजना जिम्मेवार नेताबाट त्यस्तो टिप्पणी भएकोमा दु:ख लागेको छ : गौरीबहादुर कार्की अध्यक्ष, जाँचबुझ आयोग

एमाले उपमहासचिव रघुवीर महासेठले झुटो आरोप लगाएको भन्दै जाँचबुझ आयोगले ध्यानाकर्षण भएको जनाएको छ । महासेठले सोमबार नयाँ पत्रिकासँगको कुराकानीमा आयोगका अध्यक्ष गौरीबहादुर कार्की पूर्वाग्रही रहेको आरोप लगाएका थिए ।

महासेठले भनेका थिए, ‘आयोगका अध्यक्षको अभिव्यक्ति पनि पूर्वाग्रही छ । झुन्ड्याउनुपर्छ, मार्नुपर्छ भनेर अभिव्यक्ति दिने व्यक्तिको अध्यक्षतामा आयोग गठन भएको छ ।’ एमाले अध्यक्ष केपी ओलीलाई आयोगले बयानमा बोलाउने तयारी गरिरहेको सन्दर्भमा महासेठले यस्तो टिप्पणी गरेका थिए ।आयोग अध्यक्ष कार्की आफूले कहिले पनि त्यस्तो अभिव्यक्ति नदिएको बताउँछन् ।

उनी भन्छन्, ‘नेताहरूलाई झुन्ड्याउनुपर्छ, मार्नुपर्छ भनेको छैन, एकजना जिम्मेवार नेताबाट त्यस्तो टिप्पणी भएकोमा दु:ख लागेको छ ।’ कार्की विशेष अदालतका पूर्वअध्यक्ष हुन् । यसअघि उनले मिटरब्याजदेखि सहकारी ठगीसम्बन्धी जाँचबुझ आयोगको अध्यक्ष भएर काम गरिसकेका छन् ।