प्रहरीकै मिलेमतोमा व्यापारीलाई पक्राउ गरी बलात्कार मुद्दामा फसाउने भन्दै पैसा असुलिएको घटनामा प्रहरीको केन्द्रीय अनुसन्धान ब्युरो (सिआइबी)ले अनुसन्धान पूरा गरी रायसहितको प्रतिवेदन जिल्ला सरकारी वकिल कार्यालय, ललितपुरमा बुझाएको छ । फरार रहेकी इन्स्पेक्टर बिनुकमारी शाहीसहित ६ जनाविरुद्ध मुद्दा चलाउन सिआइबीले सिफारिस गरेको छ ।
एआइजी दीपक थापा निर्देशक, सिआइबी
अनुसन्धान प्रतिवेदन मंगलबार सरकारी वकिल कार्यालयमा बुझाएका छौँ । प्रहरीसहित ६ जनालाई प्रतिवादी बनाउन सिफारिस गरेका छौैँ ।
पक्राउ परेका चार र दुई फरारको घटनामा संलग्नता देखिएको भन्दै उनीहरूमाथि संगठित अपराध र आपराधिक लाभ मुद्दा चल्न लागेको हो । प्रहरीले सो घटनामा संलग्न इटहरीका ताज इस्लाम, सुष्मा विक र भीमादेवी थापा तथा प्रहरी प्रभाग भैँसेपाटीका सहायक हवल्दार महेन्द्र हमाललाई पक्राउ गरेको छ । इन्स्पेक्टर शाहीसहित इटहरीका दर्शन पोखरेललाई फरार प्रतिवादी बनाउन प्रहरीले सिफारिस गरेको छ । गिरोहसँग शंकास्पद सम्बन्ध देखिएका एसपी कमल थापाको बयान लिए पनि प्रमाण नपुगेको भन्दै उनीविरुद्ध भने मुद्दा नचलाउन सिआइबीको सिफारिस छ । सिआइबीका निर्देशक एआइजी दीपक थापाले अनुसन्धान प्रतिवेदन मंगलबार सरकारी वकिल कार्यालयमा बुझाइएको बताए । ‘प्रहरीसहित ६ जनालाई प्रतिवादी बनाउन सिफारिस गरेका छौैँ,’ उनले भने ।
गत ७ असोजमा प्रहरी प्रभाग भैँसेपाटीमा इटहरीका एक व्यवसायीलाई थुनामा राखी बलात्कार मुद्दामा फसाइदिने भन्दै ३० लाख रुपैयाँ लेनदेन गरी छाडिएको थियो । इटहरीकै सुष्मा विकसँग ती व्यापारी केही महिनाअघि इलाम घुम्न गएका थिए । तिनै युवतीलाई कुटपिटको उजुरी हाल्न लगाई बलात्कार मुद्दा चलाउने भन्दै प्रहरी कार्यालयमै बार्गेनिङ भएको थियो ।
प्रभागकी तत्कालीन प्रहरी प्रमुख इन्स्पेक्टर शाहीको समेत त्यसमा मिलेमतो देखिएपछि उनीहरूविरुद्ध डेढ महिनाअघि नै पक्राउ पुर्जी जारी भएको थियो । तर, प्रहरीले माथिल्लो निकायको आदेश नभएको भन्दै उनलाई पक्राउ गरेन । उनको निर्देशनमा काम गर्ने हवल्दार हमाललाई भने थुनामा राखिएको छ ।
‘हनी ट्रयापिङ’को गिरोहसँग मिलेर पैसा असुलिएको घटना जिल्ला प्रहरी परिसर, ललितपुरले थाहा पाएपछि पक्राउ परेका र पीडित पक्ष सबैलाई झिकाएर छानबिन सुरु भएको थियो । जसमा प्रहरीको मिलेमतो पुष्टि भएको हो । यसरी उजुरी लिएर मिलापत्र गरेकोबारे इन्स्पेक्टर शाहीले माथिल्लो निकायलाई जानकारीसमेत गराएकी थिइनन् ।
सुरुमा ललितपुर परिसरले नै यो घटनाको अनुसन्धान गरेको थियो । तर, अनुसन्धानमा आबद्ध प्रहरी अधिकारीमाथि नै फरार इन्स्पेक्टर शाहीले आरोप लगाएर उजुरी दिएर विवादमा पार्ने प्रयास गरेपछि परिसरले फाइल सिआइबीमा पठाएको हो । सिआइबीले बाँकी अनुसन्धान पूरा गरी प्रतिवेदन पठाएको हो । जिल्ला सरकारी वकिल कार्यालय, ललितपुरका सूचना अधिकारी भरतकुमार मैनालीले सिआइबीबाट आएको प्रतिवेदन अध्ययनको क्रममा रहेको र केही दिनमै मुद्दा दायर गरिने बताए ।
ताज इस्लाम नेतृत्वको सोही गिरोहले गत जेठमा एक निर्माण व्यवसायीलाई त्यसैगरी ‘हनी ट्रयापिङ’मा फसाएको र १७ लाख रुपैयाँ लिएको छानबिनमा खुलिसकेको छ । प्रहरीमा बलात्कार मुद्दामै जाहेरी परेकोमा पछि जाहेरी फिर्ता लिन अर्काे निवेदन दिइएको थियो । यो घटनामा पनि एसपी थापाको भूमिका शंकास्पद रहेको छ । सो प्रकरणमा छुट्टै अनुसन्धान हुने सिआइबीका एआइजी थापाले बताए ।
