सैनिक आवासीय महाविद्यालयले मोक्षदा स्कुललाई डकवर्थ लुइस पद्धति (डिएलएस)का आधारमा १० विकेटले पराजित गर्दै जयकुमारनाथ शाह स्मृति यू– १६ अन्तरविद्यालय क्रिकेट प्रतियोगिताको उपाधि जितेको छ । काठमाडौं क्रिकेट एसोसिएसनले आयोजना गरेको प्रतियोगिताको आइतबार भएको फाइनल वर्षाका कारण दोस्रो इनिङ नाै ओभरमा सीमित गरिएको थियो । सैनिकले नयाँ लक्ष्य ७० रन पाएको थियो । सैनिकले ६.५ ओभरमा कुनै पनि विकेट नगुमाई लक्ष्य पूरा गर्यो ।
मूलपानी क्रिकेट मैदानमा सैनिकका लागि रमन गिरीले अविजित ३५ र रोजल खड्काले ३३ रन बनाए । टस हारेर ब्याटिङ गरेको मोक्षदाले निर्धारित २० ओभरमा आठ विकेट गुमाउँदै एक सय ४२ रन बनाएको थियो । मोक्षदाका लागि संयम नेपालले ३७, नीतीश बुढाथोकीले २४ र आलोक शाहले २२ रन बनाए । यसअघि सेमिफाइनलमा सैनिकले एन्जलहार्टलाई ८८ र मोक्षदाले डिएभी स्कुललाई १२ रनले हराउँदै फाइनलमा स्थान बनाएका थिए । उपाधिसँगै सैनिकले एक लाख ५० हजार र उपविजेता मोक्षदाले ७५ हजार रुपैयाँ पाएका छन् ।
१६ टोली सहभागी प्रतियोगितामा एन्जल्सका युवराज खत्रीले सर्वाेत्कृष्ट खेलाडी घोषित हुँदै २० हजार रुपैयाँ पाए । उत्कृष्ट बलर मोक्षदाका इशान शाह भए । मोक्षदाकै संयम उत्कृष्ट ब्याट्सम्यान भए । दुवैले जनही १० हजार रुपैयाँ पाएका छन् । इमर्जिङ खेलाडी सैनिकका सफल पौडेल भए ।
