जाजरकोट कुशे गाउँपालिकामा १५ वर्षीया बालिका बलात्कृत भएकी छिन् । गत ७ साउनमा उनी घरमै बलात्कृत भएकी हुन् । जिल्ला प्रहरी कार्यालय जाजरकोटका अनुसार घरमा कोही नभएको मौका छोपी कुशे गाउँपालिका–८ का ३० वर्षीय दीपक रोकायले बलात्कार गरेका हुन् ।
घटनामा संलग्नविरुद्ध प्रहरीले पक्राउ पुर्जी जारी गरिसकेको छ । तर, उनी अझै पक्राउ पर्न सकेका छैनन् । जिप्रका प्रमुख डिएसपी सन्तोष रोकाले बालिका बलात्कृत भएको र घटनामा संलग्न आरोपीको खोजीकार्य जारी रहेको बताए । ‘गत ७ साउन बिहान करिब १ बजे १५ वर्षीया बालिका बलात्कृत भएकी रहिछिन् । हामीकहाँ सोही दिन साँझ मात्रै उजुरी आयो । बालिकाको स्वास्थ्य परीक्षण गरायौँ । त्यस वेलासम्म घटनामा संलग्न व्यक्ति फरार भइसकेका रहेछन् । यद्यपि, उनको खोजीकार्य जारी छ । घटनाको अनुसन्धान भइरहेको छ,’ उनले भने ।
प्रहरीका अनुसार घटनामा संलग्न अभियुक्त दीपक र सोही गाउँका नरेन्द्र रोकाय गत ६ साउनमा बालिकाको घरनजिक पुगेका थिए । उनीहरू दिनभर गाउँमा बसे । लोकल कुखुरा काटे र बेलुकासम्म मदिरा सेवन गरे । बालिकाका बुबा भैँसी चराउन लेक गएको र आमा स्वास्थ्य उपचारका लागि भारतको हिमाञ्चल गएको थाहा पाएपछि दीपक र नरेन्द्र बालिकाको घरनजिक पुगे । अनुहारमा कालो दले । घरको ढोका खोल्न प्रयास गरे । नखुलेपछि उनीहरू घरको धुरीमा चढे । सँगैको झ्यालबाट घरभित्र छिरे । दीपक बालिकालाई आक्रमण गर्न उत्रिए । नरेन्द्र घरबाट बाहिरिए । र, बाहिरबाट ढोका बन्द गरिदिए । यही मौकामा दीपकले बालिकालाई पटक–पटक बलात्कार गरे ।
घरमा एक्लै रहेकी बालिकाले सक्दो प्रतिकार गरिन् । बलात्कार नगर्न भन्दै दीपकसमक्ष बिन्ती गरिन् । मदिराको नशामा दीपकले रातभर बलात्कार गरिरहेको प्रहरीको भनाइ छ । पीडित बालिकाले घटना सम्बन्धमा बुवालाई सबै कुरा जानकारी दिइन् । घटना गाउँभर फैलियो । जब पीडित बालिकाका बाबु प्रहरीमा जाहेरी दिने पक्षमा पुगे, त्यसपछि दीपक ज्यान मार्ने धम्कीमा उत्रिए । ‘घरमा कोही नभएको मौका छोपी घरको धुरीबाट भित्र छिरेर दीपक रोकायले जबर्जस्ती करणी गरेछ । बुबा जाहेरी दिन प्रहरी कार्यालय जाने निधोमा पुगेपछि उनीहरू ज्यान मार्ने धम्कीमा उत्रिए । उनीहरू अझै पक्राउ परेका छैनन् । पीडितलाई ज्यान मार्ने धम्की दिइरहेका छन्,’ पीडत बालिकाका दाजुले नयाँ पत्रिकासँग भने ।
