पूर्वाञ्चल ल्युब आयल लिमिटेडले सर्वसाधारणलाई जारी गर्न लागेको पाँच लाख कित्ता सेयर निष्कासन तथा बिक्री प्रबन्धकमा प्रभु क्यापिटल लिमिटेडलाई नियुक्त गरिएको छ ।
नियुक्तिसम्बन्धी सम्झौतामा पूर्वाञ्चल ल्युब आयलका प्रबन्ध सञ्चालक भोलेश्वर दुलाल र प्रभु क्यापिटलका प्रबन्ध सञ्चालक दिनेश थकालीले हस्ताक्षर गरेका हुन् ।
सुन्दरहरैँचा ०९, मोरङ, विराटचोकमा रजिस्टर्ड कार्यालय रहेको पूर्वाञ्चल ल्युब आयल लिमिटेडले विगत २३ वर्षदेखि आफ्नो उत्पादन तथा बिक्री–वितरण नेपालभर गरिरहेको जनाएको छ ।
आफ्ना ९३ भन्दा बढी डिलर र ११ हजारभन्दा बढी खुद्रा व्यापारीमार्फत विदेशबाट विभिन्न ब्रान्डको आयातित लुब्रिकेन्टलाई प्रतिस्थापन गर्दै नेपालको हाल एक अग्रणी लुब्रिकेन्ट कम्पनी रहेको जनाइएको छ । कम्पनीले हाल विभिन्न प्रकारका एई ब्रान्डको लुब्रिकेन्ट उत्पादन तथा बिक्री–वितरण गरिरहेको जनाएको छ ।
