सप्तरंग प्रिन्ट संस्करण

चिनीविनाको कालो कफी मेरो लत  

कतै सडकछेउ वा कार्यलयआसपासका पसलमा पुगेर कफी–डुनोट खान खुब रुचाउँछु, म । खानपिनका मामिलामा म चुजी मान्छे होइन । अनुशासित पनि होइन । त्यस्तो धेरै बार्दिनँ । बार्ने भएको भए सायद मेरो शरीर अहिले अर्कै हुन्थ्यो ।

एक–डेढ वर्षअघिसम्म दूधको चिया खान्थेँ । अहिले चियामा चिनीचाहिँ बार्न थालेको छु । चिनी नहालेको कालो कफी अहिले मेरो लत नै हो । फेरि सुगर लागेर भन्नुहोला । सुगर नहोस् भनेर स्वास्थ्य सचेतचाहिँ भएको हुँ । 

गर्मी मौसममा तीन–चार कप कफी नपिईकन मलाई चित्तै बुझ्दैन । जाडोमा त ८–१० कप नै पुग्ने गर्छ । खानामा मलाई कुखुराको मासुको झोल र भात भए केही चाहिँदैन । घरमा फुर्सदको समयमा आफैँ खाना पनि पकाउँछु ।

खाना पकाउन मलाई रमाइलो लाग्छ । कुखुराको झोल र भात निकै मिठो लाग्छ । गाउँको खान्की खुब मिस गर्छु । गाउँ जाँदा ढिँडो र दूध खान साहै्रै मन पर्छ । अझ आमाले पकाएको कसलाई मिठो नलाग्ला र !