थपिएकासमेत गरेर ३५ पाँचतारे होटेलमा ५२ सय ३३ कोठा पुग्ने 

गैरआवासीय नेपाली रामेश्वर शाहले डेढ वर्षअघि सौराहामा साधारण बुटिक रिसोर्ट निर्माण सुरु गरेका थिए । तर, काम गर्दै जाँदा बीचमै पाँचतारे रिसोर्ट सञ्चालन गर्ने सोच बन्यो । चितवनमा एउटै पाँचतारे छैन । एउटै प्रकृतिका होटेल चलिरहेका र खुल्ने गरेको चितवनमा उनले पाँचतारे रिसोर्टमा भविष्य देखे । अहिले ६४ कोठाको पाँचतारे रिसोर्ट निर्माण भइरहेको छ, जुन ‘रोयल टुलिप’ रिसोर्टको नामबाट सञ्चालन हुनेछ ।

भूकम्प, नाकाबन्दी र कोभिड महामारी नभएको भए काठमाडौंको कान्तिपथमा अहिलेसम्म पाँचतारे होटेल सेराटन सञ्चालनमा आइसकेको हुन्थ्यो । गैरआवासीय नेपाली शेष घलेको लगानी रहेको दुई सय २५ कोठाको सेराटन सन् २०१८ को फेब्रुअरीमै सञ्चालन गर्ने लक्ष्य थियो । अब यो होटेल सन् २०२३ भित्र सञ्चालनमा ल्याउने तयारीसाथ काम भइरहेको छ । शंकर समूहले नक्सालमा निर्माण गरिरहेको एक सय ७४ कोठाको पाँचतारे हिल्टन होटेल पनि आगामी वर्षभित्र सञ्चालनमा ल्याइसक्ने ‘डेडलाइन’ छ ।

बाराही ग्रुपले पोखराको सेदीमा ‘सेदी लक्जरी रिसोर्ट’ निर्माण गरिरहेको छ भने रियलस्टेट व्यवसायी इच्छाबहादुर वाग्लेले सिमराको होटेल इच्छालाई पाँचतारेमा स्तरोन्नति गर्दै छन् । धितोपत्र बोर्डका अध्यक्ष रमेश हमालको धुलिखेलमा पाँचतारे ‘दुसित थानी हिमालयन रिसोर्ट’ सञ्चालनको अन्तिम तयारीमा छ । व्यवसायी मोती दुगडले विराटनगरमा डेढ वर्षभित्रै पाँचतारे ‘र्‍याडिसन’ होटेल सञ्चालनमा ल्याउँदै छन् ।

यी त केही उदाहरण मात्रै हुन्, आगामी वर्ष ०८० भित्र देशका विभिन्न स्थानमा १७ वटा पाँचतारे होटेल सञ्चालनमा आउँदै छन्, जसमा ४९ अर्ब लगानी भइरहेको छ । निर्माणाधीन अधिकांश होटेलले व्यवस्थापनमा अन्तर्राष्ट्रिय चेन ल्याउन सम्झौता गरिसकेका छन् । अन्तर्राष्ट्रिय ब्रान्डले नेपाली पर्यटनमा पनि गुणस्तर थपिदिने व्यवसायीहरूको भनाइ छ । अहिले देशभर १८ वटा पाँचतारे होटेल सञ्चालनमा छन् । आगामी डेढ वर्षभित्र देशका ३५ वटा पाँचतारे होटेलमा पाँच हजार दुई सय ३३ कोठा पुग्नेछन् । 

अहिले देशभर दुई दर्जनभन्दा बढी पाँचतारे होटेल निर्माण भइरहेका छन् । त्यसमध्ये डेढ वर्षभित्रै सञ्चालनमा आउने भनिएका १७ पाँचतारे होटेलमा दुई हजार ४६ कोठा छन् । अहिले सञ्चालनमा रहेका १८ वटा पाँचतारेमा दुई हजार आठ सय ७७ कोठा छन् । अहिले काठमाडौंमा ११, पोखरा, बाँके र झापामा दुई–दुई र रुपन्देहीमा एउटा पाँचतारे होटेल सञ्चालनमा छन् । 

म्यारियट होटेलका सञ्चालक शशिकान्त अग्रवालले नेपालमा पर्यटनको अथाह सम्भावना देखेर नै पाँचतारे होटेलमा लगानी ओइरिएको बताए । ‘यहाँको सम्भावना देखेरै अन्तर्राष्ट्रिय होटेल चेनहरू आउन तम्सिएका हुन् । निर्माणाधीन अधिकांश होटेलले व्यवस्थापनमा अन्तर्राष्ट्रिय चेन ल्याउन सम्झौता गरिसकेका छन् । अन्तर्राष्ट्रिय ब्रान्डले नेपाली पर्यटनमा गुणस्तर थपिदिन्छन्,’ उनले भने । 

नेपाल पर्यटन बोर्डका सिइओ धनञ्जय रेग्मीले जति धेरै विदेशी चेन आउँछन्, देशलाई त्यति नै फाइदा हुने बताए । ‘उनीहरूले नेपाली पर्यटनको मार्केटिङ गरिदिन्छन् । विश्व भ्रमणमा निस्कने धनाढ्य खर्चालु पर्यटक ल्याउन पनि अन्तर्राष्ट्रिय चेनमार्फत सहज हुन्छ । किनभने धनाढ्यले बढी लक्जरी खोज्छन्,’ उनले भने, ‘अहिले पाँचतारेमा भइरहेको लगानी लहडमा होइन, सम्भावना देखेरै ओइरिएको हो । अझ सहुलियत दिएरै भए पनि अन्तर्राष्ट्रिय ब्रान्ड तान्नुपर्छ ।’ अन्तर्राष्ट्रियस्तरका होटेल खुलेपछि लक्जरी पर्यटक पनि नेपाल आउन थाल्ने उनको भनाइ छ ।

तीनवटा प्रदेशमा पाँचतारे होटेल छैन
देशभित्र पाँचतारेको संख्या १८ पुगिसक्दा पनि सुदूरपश्चिम, कर्णाली र मधेस प्रदेशमा एउटै पाँचतारे सञ्चालनमा छैनन् । सुदूरपश्चिम र कर्णालीमा अझै कसैले बनाउने घोषणा पनि गरेका छैनन् । मधेस प्रदेशमा भने सिमराको ‘होटेल इच्छा’ पहिलो पाँचतारे बन्दै छ । घरजग्गा व्यवसायी इच्छाबहादुर वाग्लेले होटेल इच्छालाई पाँचतारे स्तरमा वर्गीकरण गर्न प्रक्रिया अगाडि बढाइसकेका छन् । होटेलको स्तरोन्नति गर्दा लगानी पनि बढेर एक अर्ब ६५ करोड रुपैयाँ पुगेको उनको भनाइ छ । होटेलमा मिनी क्यासिनो पनि सञ्चालन गर्ने उनको योजना छ । 

यसकारण पाँचतारे रिसोर्ट बनाउन कस्सिएँ : रामेश्वर शाह, सञ्चालक, रोयल टुलिप रिसोर्ट (सौराहा)
अहिले देशमा डेढ दर्जन पाँचतारे छन्, तर चितवनमा एउटै छैन । त्यहाँ एउटै प्रकृतिका होटेल–रिसोर्टमा लगानी भइरहेको छ । त्यसैले पाँचतारेको आवश्यकता महसुस गरेर लक्जरी रिसोर्ट निर्माण गर्न कस्सिएको हुँ । सुरुमा साधारण बुटिक रिसोर्ट सञ्चालन गर्ने सोचले अगाडि बढेँ । तर, चितवनको बजार बुझ्दा एउटै स्तरको रिसोर्ट बनाउँदा नयाँले पुराना रिसोर्टसँग प्रतिस्पर्धा गर्न कठिन हुने देखियो । पुराना होटेल कम लगानीमा बनेका हुन्छन्, ऋण पनि हुँदैन । र, सेवा कम मूल्यमा बिक्री गर्न सक्छन् । तर, नयाँले त्यसै गर्दा सञ्चालन खर्च धान्नै गाह्रो हुन्छ । बढी मूल्य राखे प्रतिस्पर्धा गर्न सकिँदैन । त्यसैले पनि लक्जरी पाँचतारे रिसोर्टमा जान खोजेको हुँ । त्यो क्याटेगोरीमा चितवनमा प्रतिस्पर्धा नै छैन ।

पाँचतारेविहीन चितवनमा ‘रोयल टुलिप’ आउँदै
होटेलहरूको राजधानी नै मानिने चितवनमा अहिलेसम्म पाँचतारे रिसोर्ट सञ्चालनमा छैनन् । नारायणगढ, भरतपुर, सौराहा, मेघौलीलगायत ठाउँमा एउटै प्रकृतिका होटेल तथा रिसोर्ट सञ्चालनमा छन् । खर्चालु पर्यटकलक्षित मेघौलीको बाराही जंगल लज र मेघौली सेराईले पाँच तारा लिएका छैनन् । यही मौका छोपेर केटिएम हस्पिटालिटी ग्रुपले पाँचतारे रिसोर्ट निर्माण गर्न लागेको हो ।

पाँचतारे ‘रोयल टुलिप’ २०८० को दसैँसम्म सञ्चालनमा ल्याइसक्ने सञ्चालक रामेश्वर शाहले बताए । यो रिसोर्ट फ्रान्सेली ‘लुभ्र होटेल्स’ ग्रुपले सञ्चालन गर्नेछ । करिब ३४ रोपनीमा रहने रिसोर्टमा पाँच प्रकारका ६४ कोठा हुनेछन् । ‘चितवनमा पाँचतारेको स्कोप देखेर लगानी गर्न तम्सिएको हुँ, करिब ८५ करोड लगानी हुने अनुमान छ,’ शाहले भने, ‘पाँचतारेले चितवनकै पर्यटनको गरिमा बढाउने विश्वास छ ।’

प्रदेश १ मा दुईवटा पाँचतारे थपिँदै 
प्रदेश १ को झापामा ‘मेची क्राउन’ र ‘किङ्ग्सबरी’ गरी दुईवटा पाँचतारे होटेल खुलिसकेका छन् । यी दुई होटेलमा एक सय ८३ कोठा छन् । झापामै बहुराष्ट्रिय कम्पनी सिल्भर हेरिटेजले पाँचतारे होटेल ‘टाइगर टु’ बनाउने घोषणा गरिसकेको छ । यसबाहेक पनि यो प्रदेशमा छिट्टै दुईवटा पाँचतारे होटेल थपिँदै छन् । एमाले नेता एवं व्यवसायी मोती दुगडले विराटनगरमा मलसहित पाँचतारे होटेल ‘र्‍याडिसन’ सञ्चालनमा ल्याउँदै छन् । यस्तै, इटहरीका व्यवसायी भीम पौडेल र बलराम आचार्यको संयुक्त लगानीमा इटहरीमा अर्को पाँचतारे ‘सोल्टी वेस्टेन्ड इटहरी’ सञ्चालनमा आउँदै छ । र्‍याडिसनमा एक सय ४६ कोठा हुनेछन् भने सोल्टी वेस्टेन्ड (गरिमा)मा ९० कोठा रहने सञ्चालकहरूले बताएका छन् । 

सेन्चुरियन ग्रुपले विराटनगरमा डेढ बिघामा होटेल, मल र क्यासिनोका लागि १२ तलाका तीनवटा टावर ठड्याइसकेको छ । तीन अर्ब लगानी हुने होटेल अन्तर्राष्ट्रिय चेन ब्रान्ड र्‍याडिसनले सञ्चालन गर्नेछ । यस्तै, इटहरीको गरिमा होटेलको व्यवस्थापन स्वदेशी होटेल ब्रान्ड सोल्टीले गर्नेछ । एक अर्ब ३० करोड रुपैयाँ लगानी रहने यो होटेलमा क्यासिनो पनि रहने सोल्टीका उपाध्यक्ष सुदर्शन चापागाईंले बताए । आउँदो सेप्टेम्बरदेखि होटेल सञ्चालनमा ल्याउने लक्ष्यसहित फिनिसिङको काम भइरहेको उनको भनाइ छ । 

पोखराका दुईमध्ये फूलबारी बन्द, पाँचवटा पाँचतारे आवश्यक
पर्यटकीय सहर पोखरामा रहेका दुईवटा पाँचतारे होटेलमध्ये फूलबारी रिसोर्ट बन्द छ भने पोखरा ग्रान्ड मात्र सञ्चालनमा छ । कुनै समय एसियाकै उत्कृष्ट रिसोर्टमा पर्ने फूलबारी बन्द भएपछि पोखरा लक्जरी होटेलविहीन बनेको छ । पोखराका मेयर धनराज आचार्यले पर्यटकीय नगरीमा पाँचतारे लक्जरी होटेलमा लगानी हुन नसकेको बताए ।

पछिल्लो समय सोल्टी होटेल र बाराही ग्रुप पोखरामा पाँचतारे होटेल सञ्चालन गर्न कस्सिएका छन् । लेकसाइडमा रहेको २८ रोपनी जग्गामा करिब डेढ अर्ब लगानी गरेर दुई वर्षभित्र पाँचतारे होटेल खोल्ने तयारी थालिएको सोल्टीका उपाध्यक्ष सुदर्शन चापागाईंले बताए । उनका अनुसार होटेलमा सय कोठा हुनेछन् । 

बाराही ग्रुपले पामेमा साढे पाँच अर्ब लगानीमा एक सय ९० कोठाको ‘सेदी लक्जरी होटेल’ निर्माण सुरु गरिसकेको छ । ‘हाम्रो प्रोजेक्टमा ११ वटा घर हुनेछन्, जुन लामो समयसम्म बस्ने पाहुनाका लागि हो,’ ग्रुपका अध्यक्ष विप्लव पौडेलले भने, ‘अढाई वर्षभित्र निर्माण सम्पन्न गरेर सञ्चालनमा ल्याउने हाम्रो लक्ष्य छ ।’ 

मेयर आचार्यले चाँडै पोखरालाई देशको पर्यटकीय राजधानी घोषणा गर्ने तयारी भइरहेको बताए । ‘अन्तर्राष्ट्रिय विमानस्थल पनि सञ्चालनमा आउँदै छ, चीनसँग सडकबाटै पोखरा जोडिँदै छ । पोखरालाई चाँडै देशको पर्यटकीय राजधानी घोषणा गर्दै छौँ,’ उनले भने, ‘पोखरामा अझै पाँचवटा पाँचतारेको खाँचो छ ।’ पर्यटक आउन थालेपछि पोखरामा अहिलेका होटेलले नपुग्ने उनको भनाइ छ ।

बुटवल–भैरहवामा पाँचतारेको ओइरो
रुपन्देहीमा बहुराष्ट्रिय कम्पनी सिल्भर हेरिटेजले ‘टाइवर वान’ रिसोर्ट सञ्चालनमा ल्याएको छ । यो रुपन्देहीकै (बुटवल–भैरहवा–लुम्बिनी) पहिलो पाँचतारे हो । चर्चित मिठाई व्यवसायी पवनकुमार हलुवाईले लुम्बिनीमा एक सय ४६ कोठाको ‘पवन प्यालेस’ सञ्चालनमा ल्याएका छन् । २०८० भित्र बुटवल, भैरहवा र लुम्बिनीमा थप पाँचवटा पाँचतारे होटेल सञ्चालनमा आउन लागेको व्यवसायीहरू बताउँछन् । 

सिद्धार्थ हस्पिटालिटी दसैँ–तिहारसम्म भैरहवाको अञ्चलापुरमा पाँचतारे ‘होटेल सिद्धार्थ’ सञ्चालन गर्ने तयारीमा छ । ‘होटेलको धेरै काम सकिइसकेको छ, छिट्टै होटेल सञ्चालनमा ल्याउँछौँ,’ ग्रुपका अध्यक्ष लक्ष्मण न्यौपानेले भने, ‘चार बिघामा बनिरहेको होटेलमा ८५ कोठा हुनेछन्, जसमा दुई अर्बहाराहारी लगानी हुँदै छ ।’ यस्तै, घिमिरे समूहले भैरहवाको बुद्धचोकमा तीन अर्ब लगानीमा एक सय तीन कोठाको एसियन इन्टरनेसनल रिजेन्सी होटेल निर्माण अन्तिम चरणमा पुर्‍याएको छ ।

भुसाल ग्रुपले भैरहवाको बेलहियामा एक सय १७ कोठाको पाँचतारे ‘मेघा–२’ सञ्चालन गर्दै छ, जसमा साढे दुई अर्ब लगानी हुँदै छ । यो होेटेल एक वर्षभित्र सञ्चालनमा ल्याइसक्ने ग्रुपका अध्यक्ष बालकृष्ण भुसालले बताए । भैरहवाकै लुम्बिनी रोडमा एक अर्ब लगानीमा बहुराष्ट्रिय चेन होटेल ‘होली डे इन’ निर्माण भइरहेको छ । होटेल सञ्चालक सुरज उप्रेतीका अनुसार होटेलमा एक सय २५ कोठा रहनेछन् । बुटवलको सुक्खानगरमा निर्माण भइरहेको एक सय आठ कोठाको पाँचतारे सफ्रोन होटेल सन् २०२३ को नोभेम्बरसम्म सञ्चालनमा ल्याइसक्ने लक्ष्य छ । एक अर्ब ४५ करोड लगानी हुने १२ तले होटेलको सिभिल स्ट्रक्चरको काम अन्तिम चरणमा पुगेको छ । 

सन् २०८० भित्र काठमाडौंमा सातवटा पाँचतारे थपिँदै
पाँचतारे होटेल काठमाडौं उपत्यकामा केन्द्रित देखिन्छन् । अन्तर्राष्ट्रिय चेन होटेलको आकर्षण पनि उपत्यकामै बढी छ । अहिले ११ पाँचतारे होटेल रहेको काठमाडौंमा २०८० भित्र सातवटा थपिन लागेका छन् । कान्तिपथमा निर्माण भइरहेको सेराटन होटेलमा सिसा लगाउने काम भइरहेको छ । बेसमेन्टसहित २१ तलाको होटेलमा करिब १२ अर्ब लगानी हुने बताइएको छ । देशकै सबैभन्दा ठूलो लगानी हुन लागेको सेराटन आगामी वर्ष सञ्चालनमा ल्याउने तयारी छ ।

शंकर समूहले नक्सालमा एक सय ७५ कोठाको हिल्टन होटेल बनाइरहेको छ, जुन आगामी वर्षसम्म सञ्चालनमा आउनेछ । यो होटेल सञ्चालनमा आउँदा लगानी साढे ६ अर्ब रुपैयाँ पुग्ने अनुमान छ । १० रोपनी क्षेत्रफलमा बनिरहेको होटेलको १७औँ तलामा स्विमिङ पुल हुनेछ । 

बुढानीलकण्ठमा तीनवटा पाँचतारे बन्दै
काठमाडौंको बुढानीलकण्ठमा तीनवटा पाँचतारे होटेल बन्दै छन् । ‘होटेल बुढानीलकण्ठ हेरिटेज’ र ‘होली डे इन’ यसै वर्ष सञ्चालनमा आउँदै छन् । त्यस्तै, सूर्य नेपालले ६ अर्ब रुपैयाँ लगानी गरेर पाँचतारे लक्जरी होटेल खोल्ने प्रक्रिया अगाडि बढाइसकेको छ ।

अंग्रेजी नयाँ वर्ष २०२३ देखि सञ्चालनमा ल्याउने तयारी भइरहेको बुढानीलकण्ठ हेरिटेज निर्माणको अन्तिम चरणमा छ । सिए दीपक पाण्डे, सेयर व्यवसायी अम्बिकाप्रसाद पाण्डे, सिए नवराज बुर्लाकोटीलगायतको लगानी रहेको एक सय दुई कोठाको यो होटेल करिब १२ रोपनी क्षेत्रफलमा फैलिएको छ । त्यस्तै, दीपक खड्काको दुई अर्ब ६० करोड लगानीमा बनिरहेको ‘होली डे इन’ पनि यसै वर्ष सञ्चालन हुनेछ । २६ रोपनी जग्गामा बनेको यो होटेलमा एक सय १५ कोठा रहने बताइएको छ ।

अरुण चौधरी नेतृत्वको सिजी होल्डिङ्सले ललितपुरको पुल्चोकमा पाँचतारे होटेल निर्माण गरिरहेको छ । नौ रोपनी क्षेत्रफलमा बनिरहेको एक सय ८४ कोठाको ‘क्राउन प्लाजा’सन् २०२४ को सुरुवाततिरै सञ्चालनमा ल्याउने लक्ष्य छ । साढे तीन अर्ब लगानी हुने यो होटेल इन्टरनेसनल होटेल कम्पनी इन्टरकन्टिनेन्टल हस्पिटालिटी ग्रुप (आइएचजी)ले सञ्चालन गर्ने सम्झौता भएको छ ।

लाजिम्पाटमा बनिरहेको पाँचतारे ‘दुसित प्रिन्सेस’ सञ्चालनको अन्तिम चरणमा छ । यो होटेल थाइल्यान्डको अन्तर्राष्ट्रिय चेन दुसित इन्टरनेसनलले सञ्चालन गर्नेछ । कोभिड महामारी नभएको भए यो अहिलेसम्म सञ्चालनमा आइसकेको हुन्थ्यो । त्यस्तै, देशबन्धु बस्नेतसहितको टिमले सुकेधारामा पाँचतारे मेट्रोपोलिटन होटेल बनाइरहेको छ । आगामी १४ महिनाभित्र सञ्चालनमा ल्याउने होटेलमा एक सय १६ कोठा रहेका छन् भने डेढ अर्ब लगानी हुनेछ । 

धुलिखेलमा पनि पाँचतारे 
काभ्रेको धुलिखेलमा पनि पहिलोपटक पाँचतारे रिसोर्ट खुल्ने भएको छ । थाइल्यान्डको चर्चित होटेल दुसित थानीको चेन होटेल धुलिखेलमा खुल्न लागेको हो । गैरआवासीय नेपाली संघ थाइल्यान्डका पूर्वअध्यक्ष रमेश हमालले साढे दुई अर्ब लगानी गरेर ‘दुसित थानी हिमालयन रिसोर्ट’ सञ्चालन गर्न लागेका हुन् । यो रिसोर्ट देशकै पहिलो पाँचतारे वेलनेस रिसोर्ट हुने उनको भनाइ छ । ६३ रोपनीमा बनिरहेको रिसोर्टमा ८३ कोठा हुनेछन्, जुन तिहारसम्म सञ्चालनमा ल्याउने लक्ष्य छ ।