- वि.सं २o८१ बैशाख ३१ सोमबार
न्यायाधीश राजकुमार कोइराला र अधिवक्ता रुद्र पोखरेलबीच भएको संवादबारे गम्भीर छानबिन हुनुपर्ने पूर्वमहान्यायाधिवक्ता रमेश बडालले बताएका छन्। उक्त अडियो संवाद हुँदा बडाल महान्यायाधिवक्ता थिए।
उक्त अडियो केही समयअघि न्युज २४ टेलिभिजनको एक कार्यक्रममार्फत बाहिर ल्याइएको थियो। अडियो सुनेपछि सामाजिक सञ्जालमार्फत बडालले आफ्नो प्रतिक्रिया जनाएका हुन्। यदि यो टेलिफोन अडियो वास्तविक हो भने त्यसबारे छानबिन गरी सत्यतथ्य सार्वजनिक हुनुपर्ने उनको भनाइ छ।
‘टेलिफोन अडियो वास्तविक हो भने– टेलिफोन ट्यापिङ कसले गर्यो ? के सरकारले वा अरू कसले कस–कसको संवाद ट्यापिङ गर्दै छ ?,’ उनले प्रश्न गर्दै फेसबुकमा लेखेका छन्, ‘न्यायालयमा कुन हदसम्म न्यायिक विचलन र लेनदेन हुन्छ ? यसमा को कसरी संलग्न छ ? यो विषयमा गम्भीरताका साथ छानबिन गरी सत्यतथ्य सार्वजनिक हुनु आवश्यक छ।’
उनले यदि यो अडियो बनावटी हो भने यस्तो कार्यमा संलग्नमाथि पनि छानबिन गरी सत्यतथ्य सार्वजनिक हुनुपर्ने बताएका छन्। उनले संवाद सत्यतथ्य भए दोषीलाई कानुनसम्मत कारबाही हुनुपर्ने धारणा राखेका छन्।
