- वि.सं २o८१ जेठ २ बुधबार
संखुवासभाको मादी नगरपालिका–६ स्थित सातघुम्तीमा भएको यात्रुबाहक बस दुर्घटनाका मृतक र घाइतेलाई मादी नगरपालिकाले राहत सहयोग दिने भएको छ । सोमबार बसेको कार्यपालिका बैठकले मादी नगरपालिकाभित्र भएको दुर्घटनामा परेका मृतक १५ जनाका परिवारलाई एक/एक लाख रुपैयाँ र घाइते चारजनालाई ५० हजार रुपैयाँका दरले राहत दिने निर्णय गरेको मादी नगरपालिकाका मेयर विदुर लिङथेपले बताए ।
आफ्नो नगरभित्र बस दुर्घटनामा परी नगरबासीले ज्यान गुमाएका परिवार र घाइते परिवारलाई केही राहत होस् भनेर नगरपालिकाले सहयोग गरेको उनले बताए । घटनास्थलमा मृतकहरूको सम्झनामा भुमेश्वर महादेवमा स्मारक बनाइने र त्यहाँ मृतकहरूको नाम लेखिनेसमेत निर्णय भएको मेयर लिङथेपको भनाइ छ ।
मादी नगरपालिकाले दुर्घटनाको भोलिपल्ट शुक्रबार सार्वजनिक रूपमा शोक बिदा दिएको थियो । गत बिहीबार बिहान करिब साढे ७ बजेतिर मादी नगरपालिकाको ओखरबोटेदेखि इटहरीतर्फ छुटेको बस दुर्घटना भएको थियो ।
