बुद्ध एयरले पोखरालाई आधार (बेस) बनाएर विभिन्न सहरको उडानलाई तीव्रता दिएको छ । बुद्धले पोखरालाई देशका सातवटा सहरसँग सीधा हवाई सेवामार्फत जोडेको छ । अरू सहरमा पनि सीधा उडान गर्ने तयारी भइरहेको बुद्ध एयरका प्रवक्ता दीपेन्द्र कर्णले बताए । बुद्धले बुधबार पोखरा–धनगढी नियमित उडान सुरु गरेको छ । दुईतर्फ उडानमा १८ सिट क्षमताको विचक्राफ्ट जहाजका सबै सिट भरिएको प्रवक्ता कर्णले जानकारी गराए ।
अब धनगढीबाट पोखरा जानका लागि हवाईयात्रुले काठमाडौं आउनैपर्ने बाध्यता अन्त्य भएको छ । कम्पनीले बिहीबारदेखि पोखराबाट जनकपुर नियमित उडान सुरु गर्न लागेको उनले बताए । पोखरा र जनकपुर दुवै पर्यटकीय क्षेत्र भएको हुँदा पर्यटकलाई यात्रा गर्न सहज हुने कम्पनीले विश्वास व्यक्त गरेको छ ।
बुद्धले यसअघि नै पोखराबाट धनगढी, नेपालगन्ज, भैरहवा, चितवन, काठमाडौं र सिमरामा सीधा उडान सुरु गरिसकेको छ । यस्तै, भैरहवा र चितवन पनि हवाई सेवाबाट जोडिएको छ । विराटनगरबाट तुम्लिङटार नियमित उडान गरिरहेको बुद्धले विराटनगर–भद्रपुर उडान पनि सुरु गर्ने तयारी गरिरहेको कर्णले बताए । अहिले बुद्धले पोखराबाट सबै गन्तव्यमा विचक्राफ्टबाट उडान गरिरहेको छ ।