Skip This
संसदमा महाभियोग प्रस्तावसँगै प्रधानन्यायाधीश चोलेन्द्रशमशेर जबरा निलम्बनमा परेपछि कायममुकायम प्रधानन्यायाधीशको जिम्मेवारी सम्हालेका दीपककुमार कार्कीले शुक्रबारका लागि सर्वोच्चको पूर्ण बैठक (फुलकोर्ट) आह्वान गरेका छन् । सोमबार न्यायाधीशहरूसँगको छलफलपछि कार्कीले बैठक बोलाएका हुन् ।
जबरा निलम्बनमा परेपछि सर्वोच्चमा हाल १९ न्यायाधीश छन् । यीमध्ये तेजबहादुर केसी, विश्वम्भरप्रसाद श्रेष्ठ र कुमार चुँडाल बिदामा छन् । बाँकी १६ न्यायाधीशको अनौपचारिक बैठकपछि कार्कीले पूर्ण बैठक बोलाएका हुन् । बिदामा रहेका न्यायाधीश पनि सहभागी हुन सक्ने गरी बैठकको मिति तय गरिएको छ ।
सर्वाेच्चकै न्यायाधीशहरूले जबराको राजीनामाका लागि दबाब दिँदै आएका थिए । केही समय इजलास नै बहिष्कार गरेका न्यायाधीशहरू पछि जबरासँग भने बेन्च सेयर नगर्ने निर्णयसहित इजलास फर्किएका थिए ।
जबराविरुद्ध महाभियोग दर्ता भएपछि पहिलोपटक पूर्ण बैठक बस्न लागेको हो । जसमा संवैधानिक इजलास गठनलगायत विषयमा छलफल हुन लागेको स्रोत बताउँछ । जबराका कारण महिनौँदेखि संवैधानिक इजलास बस्न सकेको छैन, जहाँ महत्वपूर्ण मुद्दाहरू रोकिएका छन् । संवैधानिक इजलास कसरी बोलाउने भन्ने विषयमा छलफल गर्न पूर्ण बैठक बस्न लागेको सर्वाेच्चका एक अधिकारीले बताए ।
