हिमपातमै बुस्टर खोप अभियान सञ्चालन
हिमाली जिल्ला मनाङमा नाै सय ९५ जनाले बुस्टर खोप लगाएका छन् । हिमपातकै अवस्थामा पनि मनाङमा कोभिड– १९ विरुद्धको ‘बुस्टर’ खोप अभियान सञ्चालन भइरहेको छ । कोभिसिल्ड र भेरोसेलको दोस्रो मात्रा लगाएर ६ महिना पूरा भएका नागरिकका लागि बुस्टर खोप लगाउने कार्यक्रम सञ्चालन गरिएको स्वास्थ्य कार्यालय मनाङले जनाएको छ ।
मनाङमा कोभिसिल्ड र भेरोसेल खोप उपलब्ध भएको स्वास्थ्य कार्यालय मनाङका प्रमुख बद्री आचार्यले बताए । उनका अनुसार प्राथामिकतामा पर्ने सुरक्षाकर्मी, ज्येष्ठ नागरिक, विभिन्न बिरामी साथै अन्य सर्वसाधारणलाई पनि बुस्टर खोप लगाइएकोे छ । आचार्यका अनुसार प्राथमिकतामा पर्नेसँगै अन्य नागरिकलाई पनि बुस्टर खोप लगाउन थालिएको हो ।
१८ वर्षभन्दा माथिका सबैले कोरोनाविरुद्धको पहिलो र दोस्रो खोप लगाए
मनाङमा १८ वर्षभन्दा माथिका सबैले कोरोनाविरुद्धको पहिलो र दोस्रो मात्राको खोप लगाइसकेका छन् । पहिलो र दोस्रो खोप लगाउनेकाे संख्या चार हजार तीन सय ९९ रहेको आचार्यले जानकारी दिए । उनका अनुसार यसअघि चामे गाउँपालिकामा बुस्टर खोप लगाउन सुरु गरिएकोमा तल्लो क्षेत्रको नासों गाउँपालिकामा गत आइतबारदेखि बुस्टर खोप लगाउन थालिएको छ ।
माथिल्लो मनाङको मनाङ ङिस्याङ गाउँपालिकामा माघ २० बाट लगाउने तयारी छ । नार्पाभूमि गाउँपालिकामा चिसोका कारण सबैजना काठमाडौं, पोखरा, बेंसीसहर झरेकाले फागुनमा मात्रै बुस्टर खोप लगाउने कार्यक्रम तयार भएको छ ।
प्रमुख जिल्ला अधिकारी रवीन्द्रप्रसाद आचार्यले चिसोका कारण मनाङका धेरैजसो स्थानिय जिल्लाबाहिर भएकाले सोचेअनुरूप खोप दिन नसकिएको बताए । उनले जिल्लामा कोरोनाको खोपलाई प्रथामिकतामा राखिएको बताए ।
०७७ माघ महिनामा १८ वर्षमाथि उमेर समूहका मनाङ जिल्लावासीले पूर्ण मात्रा खोप लगाइसकेका छन् । कोरोनाविरुद्धको पूर्ण खोप लगाउने पहिलो जिल्ला मनाङ नै हो ।