विराटनगर–जोगबनीनाअन्तर्गत पर्ने भारतको बिहार राज्यको अररिया जिल्लास्थित परमान नदीमा रहेको मिरगन्ज पुल पुनः भासिएपछि उद्योगी–व्यपारीहरूमा रिरुटको समस्या र आर्थिक भार थपिने भएको छ । जीर्ण रहेको पुरानो पुल बाढीले गर्दा थप जीर्ण भएपछि भारत सरकारले स्तरोन्नति गरेर सञ्चालनमा ल्याएको थियो । तर, पुल पुनः भासिएपछि २३ पुसदेखि भारतले पुलमा बेरियर लगाएर सबैखाले मालवस्तु आवतजावत बन्द गराएको छ । विराटनगर जोगबनीनाअन्तर्गत रहेको मिरगन्ज पुलबाट दैनिक तीन सयभन्दा बढी मालबाहक सवारीसाधन आवतजावत गर्दै आएका थिए ।
भासिएको मिरगन्ज पुल दुई दिनभित्र सञ्चालनमा नआए विराटनगर भन्सारको राजस्व असुलीमा दैनिक ३० करोड प्रभाव पर्नेछ । यसैले वैकल्पिक मार्गबारे खोजी भइरहेको विराटनगर भन्सार प्रमुख नारायण सापकोटाले बताए । उनका अनुसार दुई दिनभित्र पुलबाट मालबाहक सवारी आवतजावत हुन नसकेमा सुनसरीको भन्टावारीस्थित सेतुबन्ध भन्सार वा विराटनगरपूर्वको अररिया जिल्लाको कुर्साकाटा नाका रिरुटका रूपमा प्रयोग गरिनेछ । कुर्साकाटा नाकाबाट विराटनगर भन्सार १० किमि दूरीमा छ भने सेतुबन्ध भन्सार नाका हुँदै विराटनगर भन्सार डेढ सय किलोमिटरको दूरी तय गर्नुपर्छ ।
पुरानो र जीर्ण फलामे मिरगन्ज पुलकै समस्याका कारण नेपाली उद्योगी–व्यापारीहरूले पटक–पटक सास्ती खेप्दै आएका छन् । कुर्साकाटा नाकाको रुट भारतर्फ पक्की र नेपालतर्फ कच्ची रहेको छ भने भारतको वथनाह हँदै सुपौल जिल्लाको वीरपुर भएर भन्टाबारीस्थित सेतुबन्ध भन्सार नाका भने पक्की नै छ । नेपाल सरकारको आग्रहमा भारतले परवान नदीमा नयाँ पुल बनाउन सुरु गरे पनि अझै निर्माण सम्पन्न भएको छैन । आगामी मार्च महिनासम्ममा पुल निर्माण सम्पन्न हुन सक्ने भारतीय पक्षले बताएको छ ।
भासिएको मिरगन्ज पुल सुचारु नभएमा नेपालमा औद्योगिक कच्चा पदार्थ ल्याउन र उत्पादित वस्तुहरू पठाउन खर्चिलो हुने उद्योग परिसंघ प्रदेश १ का अध्यक्ष भीम घिमिरेले बताए । उनका अनुसार तत्काल भासिएको पुल सुचारु हुन सक्ने अवस्था छैन । मिरगन्ज पुल भासिएपछि सयौँ ट्रक–कन्टेनरहरू भारत र नेपालतर्फ अलपत्र परेका छन् । भन्सार प्रमुख सापकोटाका अनुसार वैकल्पिक मार्गबारे निर्णय भएपछि मात्र ठप्प भएका मालबाहक सवारीसाधन सुनसरीको भन्टाबारी वा अन्य नाकाबाट रिरुट हुन थाल्नेछन् । ०७४ साउनमा बाढीले क्षति पुर्याएको परमान नदीको फलामे पुल दुई महिनाको मर्मतपछि २३ असोज ०७४ बाट अर्धक्षमतामा सञ्चालनमा आएको थियो ।
