अर्थ प्रिन्ट संस्करण

नेपालमा लगानी गर्न चिनियाँ व्यवसायीलाई आग्रह

चीनको ल्हासास्थित नेपाली महावाणिज्यदूत नवराज ढकालले नेपालमा लगानी गर्न चिनियाँ व्यवसायीलाई आग्रह गरेका छन् । महावाणिज्य दूतावासमा मंगलबार चाइना एसोसिएसन अफ ट्रेडका पदाधिकारीसँग भेटवार्ता गर्दै उनले नेपालमा लगानी बढाउन आग्रह गरेका हुन् । 

भेटमा नेपालमा लगानी गरेका तथा लगानी गर्ने सोचमा रहेका व्यवसायीहरूको उपस्थिति रहेको थियो । नेपालमा लगानीको अवसरका विषयमा भएको छलफलमा चिनियाँ पक्षले लगानीका क्षेत्रका बारेमा चासो राखेका थिए । महावाणिज्यदूत ढकालले नेपालमा लगानीका क्षेत्र, सम्भावना र अवसरका बारेमा जानकारी गराएका थिए । नेपालमा लगानी गरिरहेकालाई लगानी बढाउन र लगानी गर्ने सोचमा रहेकालाई लगानी गर्न आग्रह गरेको उनले बताए । 

‘नेपालमा लगानी सहजीकरणका लागि महावाणिज्यदूत सदैव तयार रहेको र सहजीकरणका लागि मैले प्रतिबद्धता व्यक्त गरेँ,’ उनले भने, ‘चिनियाँ पक्षले नेपालमा लगानी बढाउन चासो देखाएका छन्, छिट्टै नेपालमा आउनेसमेत बताएका छन् ।’