- वि.सं २०८१ बैशाख १४ शुक्रबार
माओवादी केन्द्रका नेता नारायणकाजी श्रेष्ठले लिपुलेक, कालापानी र लिम्पियाधुराको मुद्दा उठाउनु विद्यार्थी संगठनको कर्तव्य भएको बताएका छन् । भक्तपुरको सल्लाघारीमा सोमबार सम्पन्न अखिल(क्रान्तिकारी)को बागमती प्रदेशस्तरीय भेलालाई सम्बोधन गर्दै श्रेष्ठले यस्तो बताएका हुन् ।
शैक्षिक र राजनीतिका अलवा राष्ट्रियताको मुद्दा पनि विद्यार्थी संगठनको महत्वपूर्ण मुद्दा भएको उनको भनाइ छ । उनले भने, ‘लिपुलेक लिम्पियाधुरा र कालापानीको समस्या उठाउनु विद्यार्थी संगठनहरूको कर्तव्य र दायित्व हो ।’
फरक प्रसंगमा श्रेष्ठले केपी ओलीका कारण नेकपा राजनीतिक र सांस्कृतिक रूपमा समेत भ्रष्टीकरण भएकाले एमालेसँग सम्बन्ध विच्छेद गर्नुपरेको बताएको अखिल क्रान्तिकारीका प्रवक्ता जिपी मैनालीले जानकारी दिए ।
कार्यक्रममा माओवादी क्रेन्द्रका नेता हितमान शाक्यसहित केन्द्रीय नेताहरू नारायण दाहाल र दिलीप प्रजापतिले प्रशिक्षण दिएका थिए । बैठकलाई अखिल क्रान्तिकारी अध्यक्ष रन्जित तामाङ, महासचिव उत्तम अधिकारीसहित पूर्वअध्यक्षहरू लेखनाथ न्यौपाने र रत्न ढकालले सम्बोधन गरेका थिए ।
