मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
२०७८ बैशाख ३१ शुक्रबार ०६:१०:००
Read Time : > 1 मिनेट
मुख्य समाचार प्रिन्ट संस्करण

अर्को साता नेपाललाई  अमेरिकी सहायता आउने

रक्षा मन्त्रालयद्वारा २७ लाख ५० हजार  डलरबराबरको सहयोग घोषणा

Read Time : > 1 मिनेट
२०७८ बैशाख ३१ शुक्रबार ०६:१०:००

नेपालका लागि अमेरिकी राजदूत रेन्डी बेरीले अर्को सातासम्म नेपालमा अमेरिकी सरकारका तर्फबाट नेपाललाई स्वास्थ्य सामग्री सहयोग गर्ने बताएका छन् । उपप्रधानमन्त्री ईश्वर पोखरेलसँग बिहीबार भएको टेलिफोन संवादमा राजदूत बेरीले नेपाललाई दिने स्वास्थ्य सामग्रीबारे आइतबारसम्म टुंगो लाग्नेसमेत स्पष्ट पारेका छन् । अमेरिकी रक्षा मन्त्रालयले बिहीबारै नेपाललाई अक्सिजन सिलिन्डर, लिक्विड अक्सिजन, अक्सिजन स्टोरेजलगायत प्रयोजनका लागि बिहीबार २७ लाख ५० हजार अमेरिकी डलरबराबरको सहयोग घोषणा गरेको छ ।

उपप्रधानमन्त्री पोखरेलले स्वास्थ्य सामग्री तथा खोपका लागि पछिल्लोपटक कूटनीतिक ताकेता गर्दै आएका छन् । ‘खोपका बारेमा मैले पनि पहल गरिरहेको छु, टुंगो लाग्नासाथ तपाईंलाई जानकारी गराउँछु,’ अमेरिकी राजदूत बेरीलाई उद्धृत गर्दै उपप्रधानमन्त्री पोखरेलका प्रेस सल्लाहकार गणेश पाण्डेले भने । 

अमेरिकी राजदूत बेरीले हप्तामा दुईवटा अन्तर्राष्ट्रिय उडान गर्ने वातावरण बनाइदिन पनि उपप्रधानमन्त्री पोखरेललाई आग्रह गरेका थिए । जवाफमा पोखरेलले सिसिएमसीको बैठकबाट यसबारे आवश्यक निर्णय हुने बताए । 

उपप्रधानमन्त्री पोखरेलले नेपाललाई सक्दो छिटो खोप उपलब्ध गराइदिने वातावरण मिलाइदिन आग्रह गरेका थिए । उनले अमेरिकी खोपको नेपालमा उत्सुकता र तीव्र प्रतीक्षा रहेकोसमेत बताएका थिए । यसैगरी, कोरोना रोकथाम तथा नियन्त्रणका लागि आवश्यक भेन्टिलेटर, पिपिई, अक्सिजन सिलिन्डर, अक्सिजन कन्सेन्ट्रेटर, मोबाइल अक्सिजन प्लान्ट, औषधि, खोप र खोपसँग सम्बन्धित सामग्री, अस्थायी अस्पताल स्थापनाका लागि आवश्यक पूर्वाधार र आवश्यक विज्ञ जनशक्तिलगायत विषयमा नेपालले अमेरिकासँग सहयोगको अपेक्षा गरेको पोखरेलको भनाइ थियो । 

उपप्रधानमन्त्री पोखरेलले यसअघि नेपालस्थित संयुक्त राष्ट्रसंघीय आवासीय संयोजक सारा बेस्लो न्यान्तीसँग पनि विश्व स्वास्थ्य संगठन (डब्लुएचओ)बाट पाउने कोभ्याक्सअन्तर्गतको खोप सक्दो छिटो नेपाल ल्याउन सहजीकरणका लागि आग्रह गरेका थिए ।

नेपाललाई अमेरिकाले युएसएडअन्तर्गत हालसम्म चार करोड ५१ लाख अमेरिकी डलरबराबरको सहयोग गरेको अमेरिकी दूतावासले जनाएको छ । कोभिड सुरु भएयता अमेरिकी सहायता नेपालका ५५ जिल्लामा पुगेको पनि उसको दाबी छ । युएसएडले १०० भेन्टिलेटर, १० हजारजति पिपिई तथा एन्टिरेट्रोभाइरल औषधिलगायत सहयोग गरेको छ ।

थप २७ लाख ५० हजार डलर सहायता घोषणा
अमेरिकी रक्षा मन्त्रालयले नेपाललाई अक्सिजन सिलिन्डर, लिक्विड अक्सिजन, अक्सिजन स्टोरेजलगायतको प्रयोजनका लागि बिहीबार २७ लाख ५० हजार अमेरिकी डलरबराबरको सहयोग घोषणा गरेको छ । हालसम्म कोरोना सुरु भएयता रक्षा मन्त्रालयबाट ५८ लाख डलरबराबरको सहयोग गरेको अमेरिकी दूतावासले जनाएको छ । पछिल्लो साता रक्षा मन्त्रालयले स्वास्थ्य मन्त्रालय तथा कोभिड क्राइसिस मेनेजमेन्ट सेन्टर (सिसिएमसी)लाई अत्यावश्यक पिपिई, मेडिकल आपूर्ति, हाइफ्लो अक्सिजन थेरापी उपकरण उपलब्ध गराएको थियो ।

कोभ्याक्सअन्तर्गत यसअघि नेपालमा तीन लाख ८६ हजार डोज खोप आइसकेको छ । कोभ्याक्सअन्तर्गत चाँडै नै खोप पाउने एसियाली मुलुकको सूचीमा नेपाल रहेको अमेरिकी दाबी छ । अमेरिकाले एस्ट्राजेनेका खोप उपलब्ध गराउन प्रतीक्षारत रहेको पनि दूतावासले जनाएको छ । आगामी दुई महिनाभित्र अमेरिकाले ६ करोड एस्ट्राजेनेका खोप कोभ्याक्सलाई उपलब्ध गराउनेछ । तर, कुन क्राइटेरियाका आधारमा खोप वितरण गर्ने भन्ने निश्चित छैन । अमेरिकाले सबैभन्दा बढी आवश्यक भएको र प्रभावकारी भएको ठाउँमा खोप उपलब्ध गराउने पनि दूतावासले जनाएको छ ।