नेकपा माओवादी केन्द्रले बैठकका लागि ६ एजेन्डा तय गरेको छ । पार्टी कार्यालय कोटेश्वरमा मंगलबार बसेको स्थायी कमिटी बैठकले कार्यसूची तयार परेको हो ।
एजेन्डाको रूपमा रिपोर्टिङ, पार्टी विधान, सङ्गठनात्मक कार्यदलको काम, आगामी केन्द्रीय कमिटी बैठक, नयाँ सरकार गठन र वर्तमान सरकारलाई दिएको समर्थन फिर्ता तथा विविध तय गरिएको छ । अर्को बैठक बुधबार दिउँसो कोटेश्वरमा बस्ने छ ।
हठात् अस्वाभाविक ढङ्गले प्रतिनिधिसभाको अधिवेशन अन्त्य गरेको भन्दै बैठकले भत्र्सना गरेको छ ।
कोभिड– १९ को दोस्रो लहर देखापरेको भन्दै माओवादीले कोरोना नियन्त्रणमा लाग्न आह्वान गरेको छ । सरकारले आफैँले गरेको निर्णयविपरीत भिडभाड हुने काम गरेको भन्दै माओवादी केन्द्रले निन्दा गरेको छ ।
बैठकपछि नेता नारायणकाजी श्रेष्ठले राष्ट्रियताका लागि पनि वर्तमान सरकार परिवर्तन आवश्यक रहेको बताए । ओली नेतृत्वको सरकार हटाएर नयाँ सरकार बनाउन पहल भइरहेको उनले बताए ।
संवैधानिक रूपमा निर्वाचन हुने अवस्था बने आफूहरूलाई मान्य हुने उनले बताए । ओली सरकारले निर्वाचन घोषणा हुने, तर निर्वाचन नगर्ने खतरा पनि उत्तिकै रहेको उनले बताए ।