पालिका अपडेट प्रिन्ट संस्करण

भेरी अस्पतालमा उपचार पाउन मुस्किल

भर्ना भएका ८२ कोरोना संक्रमितमध्ये ४१ जनाको स्वास्थ्य अवस्था चिन्ताजनक

नेपालगन्जस्थित भेरी अस्पतालमा भर्ना भएका ८२ कोरोना संक्रमितमध्ये ४१ जनाको स्वास्थ्य अवस्था चिन्ताजनक छ । दैनिक संक्रमित थपिए पनि जनशक्ति नहुँदा उपचारमा समस्या भएको छ । एकजना स्वास्थ्यकर्मीले एकजना संक्रमितको हेरचाह गर्नुपर्ने स्वास्थ्य मापदण्ड भए पनि ४२ जना स्वास्थ्यकर्मीले ८२ जना बिरामीको उपचार गर्दै आएको अस्पतालका प्रमुख मेडिकल सुपरिटेन्डेन्ट डा.प्रकाशबहादुर थापाले बताए । 

भेरी अस्पतालमा कोरोना संक्रमितका लागि एक सय ४२ बेड व्यवस्थापन गर्ने भनिए पनि एक सय बेड सञ्चालनमा ल्याएको उनले बताए । बेड थप गरिए पनि जनशक्ति अभावका कारण बिरामीको हेरचाह गर्न नसकिएको उनले बताए ।

‘हालको जनशक्तिले थप बिरामीको उपचार सम्भव छैन, तैपनि बिरामीको चापलाई मध्यनजर गरी भर्ना लिइरहेका छौँ,’ डा.थापाले भने । आइसियूमा मात्र २५ जना जनशक्ति खटिँदै आएको उनले बताए । प्रदेश सरकारले भेरी अस्पताललाई चिकित्सकसहित ४२ जना जनशक्ति उपलब्ध गराएको छ । प्रदेश सरकारले पठाएको जनशक्तिले ४२ जनाभन्दा धेरै बिरामी हेर्न सक्ने अवस्था नरहेको थापाले बताए ।