- वि.सं २o८१ बैशाख ३१ सोमबार
बर्दिया राष्ट्रिय निकुन्जमा गैँडा गणनामा खटिएका व्यक्तिलाई आक्रमण गर्ने नरभक्षी बाघलाई ललितपुरस्थित सदर चिडियाखानामा ल्याइएको छ । निकुन्जको टोलीले आइतबार साँझ नियन्त्रणमा लिएको बाघलाई मंगलबार ललितपुरको जावलाखेलस्थित केन्द्रीय सदर चिडियाखानामा ल्याएको हो ।
आइतबार गैँडा गणना गरी फर्कने क्रममा हात्तीलाई घाँस काट्दै गरेको अवस्थामा हात्तीसारका कर्मचारी ३४ वर्षीय पुलिसराम थारूको नरभक्षी बाघले आक्रमण गर्दा ज्यान गएको थियो । निकुन्जका कर्मचारीलाई मारेपछि नरभक्षी बाघलाई नियन्त्रणमा लिइएको थियो । १० वर्षको उक्त भाले बाघलाई बर्दियाबाट गाडीमा हालेर ललितपुर ल्याइएको हो ।
बर्दियाबाट ल्याइएको बाघलाई चिडियाखानामा राख्ने क्रममा आयोजित कार्यक्रममा वनमन्त्री प्रेमबहादुर आलेले जंगली जनावरको आक्रमणबाट हुने घटना दोहोरिन नदिन राष्ट्रिय निकुन्जहरूमा पर्खाल लगाउने अथवा विद्युतीय तारबार गर्नुपर्ने बताए । त्यसका लागि आफूले अर्थमन्त्रीसँग बजेट विनियोजन गर्ने विषयमा कुराकानी गरेको उनले जानकारी दिए ।
