सभामुख अग्निप्रसाद सापकोटाले प्रतिनिधिसभाले बिस्तारै लय समात्ने बताएका छन् । शनिबार जिपी कोइराला मेमोरियल(सामुदायिक) कलेजको आठौँ वार्षिकोत्सव समारोहलाई सम्बोधन गर्दै सभामुख सापकोटाले प्रतिनिधिसभा सञ्चालनमा केही समस्या भएका कारण त्यसलाई लयमा फर्काउन मिहिनेत गर्नुपर्ने आवश्यकता रहेको बताएका हुन् ।
संसद् छलफल, बहस, वादविवाद र संवाद हुँदै अघि बढ्ने भन्दै उनले चुनौतीको सामना गर्न प्रतिकुलतामा पनि अनुकूलता खोज्ने उपाय खोजिरहेको बताए । संसद्को अनेकौँ चुनौतीको सामना गर्दै गुणस्तरीय कानुन निर्माणका लागि प्रयत्न गरिरहेको पनि उनको भनाइ छ ।
उनले भने– ‘अलिकति समस्या छ । त्यसलाई लयमा फर्काउनका लागि बढी नै मिहिनेत गर्नुपर्ने आवश्यकता छ । तर, हिजोबाट तपाईंहरूलाई लाग्यो होला अब त्यसले लय समात्छ । त्यसले गति लिन्छ । त्यो जीवन्त र जनमुखी हुने नै छ । हामीले संसद्लाई जीवन्त र जनमुखी बनाउने प्रण गरेका छौँ । संसद्को मुख्य काम कानुन निर्माण गर्ने हो । कानुन निर्माण गर्ने कुरामा हामी अनेकन चुनौतीको सामना गर्दै त्यसलाई गुणस्तरीय कानुन निर्माण गर्नका लागि भगीरथ प्रयत्न गर्दै छौँ र त्यसपछि बनेको कानुन कार्यान्वयन गर्ने हाम्रो कर्तव्य हुनेछ ।’