- वि.सं २o८१ बैशाख ३० आइतबार
केन्द्रमा पार्टी विभाजन भएपछि आज (सोमबार) ओली समूहले युवाहरूको कर्णाली प्रदेश भेला गर्न लागेको छ ।
युवाहरूको भेलालाई नेता महेश बस्नेतले सम्बोधन गर्ने कार्यक्रम रहेको ओली समूहका नेता टेकेन्द्र बस्नेतले जानकारी दिए ।
‘देशको राजनीतिक कोर्स परिवर्तन भएका कारणले युवाहरूलाई त्यसको जानकारी दिने कार्यक्रम रहेको छ,’ उनले भने, ‘त्यो कार्यक्रममा नेता महेश बस्नेतलगायतका अन्य नेताले सम्बोधन गर्ने कार्यक्रम रहेको छ ।’
त्यस्तै, प्रचण्ड–माधव नेपाल पक्षधर नेकपाका नेताहरू पनि कर्णाली प्रदेशमा प्रवेश गरेका छन् । त्यो समूहका नेता विष्णु रिजाल र निरक आचार्य कर्णालीमा प्रवेश गरेका हुन् ।
कर्णाली प्रवेश गरेका रिमाल र आचार्यले सोमबार बिहान पत्रकार सम्मेलन गर्दै प्रधानमन्त्री केपीओली प्रतिगमनको मतियार भएको आरोप लगाएका छन् ।
सबै कमिटीमा बहुमत रहेकाले आफूहरू नै आधिकारिक पार्टी हुने दाबी पनि गरे ।
‘दक्षिणतिरबाट योबीचमा लगातार आएका छन् । केही देखिने र केही नदेखिने भ्रमणहरू भारतबाट भएका छन् । कतै त्यसले हाम्रो अन्तरपार्टी संघर्षलाई बढावा दिएको त होइन ?’ प्रश्न गर्दै नेता रिजालले भने, ‘जुन संसद्ले नेपालको भूमिमाथिको अधिकार स्थापित गऱ्याे र जसलाई यो संसद् मन परेको थिएन कतै तिनीहरूकै कारण त यस्तो भएको होइन ?’
