पहिरो प्रभावित जाजरकोटको बारेकोट गाउँपालिकामा खाद्यान्न संकट देखिन थालेको छ । बाढीपहिरोको त्रासले पाँच सय बढी परिवार विस्थापित भएर विद्यालय, गोठ र चउरमा बसिरहेका छन् । भएको खाद्यान्न सकिँदै गएपछि विस्थापित परिवार समस्यामा परेका छन् ।
बारेकोटकोमा गएको पहिरोमा परेर अहिलेसम्म ११ जनाको ज्यान गइसकेको छ । तीनजना बेपत्ता छन् । गाउँपालिकाका विभिन्न ठाउँमा धाँजा फाटेका छन् भने पहाडमा चिरा परेको छ ।
बारेकोटमा खाद्यान्न किन्न नपाइने भएकाले विस्थापितहरू भोकभोकै पर्न थालेको गाउँपालिका प्रमुख प्रशासकीय अधिकृत गोविन्द सिंहले बताए । बारेकोट गाउँपालिकामा उत्पादित अन्नले वर्ष दिनमा ६ महिना मात्र खान पुग्छ ।
यातायातको असुविधाका कारण ढुवानी समस्याले निजी क्षेत्रमा खाद्य पसल छैनन् । मानिस खाद्य संस्थानको चामलकै भर पर्ने गरेका छन् । बर्सेनि खाद्य संकट भइरहने जाजरकोटको बारेकोटका करिब २० हजार जनताका लागि भनेर सरकारले स्थापना गरेको खाद्य डिपो यतिवेला रित्तै छ । खाद्यान्न ढुवानीको जिम्मा लिएका ठेकेदारले चामल ढुवानी नगर्दा खाद्यान्न संकट देखिएको छ ।