इपिएसले बढायो राहदानीको माग

पछिल्लो एक सातादेखि विद्युतीय राहदानीको मागमा उल्लेख्य वृद्धि भएको छ । दक्षिण कोरियामा रोजगार अनुमति प्रणाली (इपिएस)मा आवेदन तथा श्रम स्वीकृति प्रक्रिया अघि बढेसँगै राहदानीका लागि आवेदन दिने नेपालीको संख्या बढ्दा चाप थपिएको हो ।

इपिएसअन्तर्गत दक्षिण कोरियामा रोजगारीका लागि सात हजार दुई सयजनाको माग भएको छ । यसबाहेक वैदेशिक रोजगारी, अध्ययन, भ्रमण, उपचार तथा अन्य प्रयोजनका लागि विदेश जाने नेपालीको संख्या बढ्दै जाँदा विद्युतीय राहदानीको माग निरन्तर बढिरहेको छ । 

विभागले विद्युतीय राहदानी (इ–पासपोर्ट)को माग सम्बोधन गर्न उत्पादन क्षमता विस्तार गर्दै दैनिक करिब १५ सय राहदानी छपाइ गर्न थालेको जनाएको छ । गत २९ असारदेखि जर्मन कम्पनीहरूबाट नयाँ पासपोर्ट छपाइ हुन थालेपछि पासपोर्ट छपाइको संख्या निरन्तर बढिरहेको विभागले जनाएको छ ।

विभागले बुधबार जारी गरेको प्रेस विज्ञप्तिमा नेपाली नागरिकलाई सहज, सरल, छिटो, सुरक्षित तथा प्रभावकारी रूपमा विद्युतीय राहदानी उपलब्ध गराउने उद्देश्यले सेवा प्रणाली तथा राहदानी उत्पादन क्षमतामा निरन्तर सुधार गर्दै आएको जिकिर गरेको छ ।