हेटौँडाबाट १३८ किलोभन्दा बढी गाँजासहित ६ जना पक्राउ

मकवानपुर प्रहरीले विशेष सूचनाका आधारमा गरेको संयुक्त कारबाहीमा छुट्टाछुट्टै स्थानबाट करिब एक क्विन्टलभन्दा बढी गाँजा बरामद गरेको छ । 

आइतबार बिहान मकवानपुरको हेटौँडा उपमहानगरपालिका– ३, बसामाडीनजिकै दुईवटा इभी गाडी जाँच गर्ने क्रममा गाँजासँगै ६ जनालाई पक्राउ गरिएको प्रहरीले जनाएको छ ।

बागमती प्रदेश प्रहरी कार्यालय हेटौँडा र प्रहरी चौकी बसामाडी लेवटको टोलीले बिहान ४:५० बजे बा.प्र.०६–००१ ज ०५०३ नम्बरको यात्रुबाहक इभी गाडी रोकी जाँच गर्दा २६ किलो १० ग्राम गाँजा बरामद गरेको मकवानपुर प्रहरी प्रवक्ता डिएसपी श्यामु अर्यालले जानकारी दिए ।

उक्त गाडीमा सवार राक्सीराङ गाउँपालिका– १ का ३० वर्षीय प्रेमराज मोक्तान, १९ वर्षीय सन्दीप थिङ र १९ वर्षीय बुद्धिलाल मोक्तान पक्राउ परेका छन् । यसैगरी, आइतबार नै बिहान ४:१५ बजे अर्को बा.प्र.०१–००२ ज ६५४९ नम्बरको इभी गाडीमा गरिएको जाँचमा ११२ किलो ७९० ग्राम गाँजा फेला परेको प्रवक्ता अर्यालले बताए ।

उक्त गाडीका चालक काभ्रे पाँचखाल नगरपालिका– ८ का २१ वर्षीय सुदीप तामाङ, २० वर्षीय सविन तामाङ र दोलखा सैलुङ गाउँपालिका– ८ का २२ वर्षीय सागर तामाङ पक्राउ परेका हुन् । प्रहरीका अनुसार बरामद गाँजा र दुवै गाडी नियन्त्रणमा लिएर मकवानपुर जिल्ला अदालतबाट म्याद अनुमति लिई थप अनुसन्धान कार्य भइरहेको प्रवक्ता अर्यालले बताए ।