राष्ट्रिय महिला लिग छनोटमा सय गोल पूरा 

राष्ट्रिय महिला लिग छनोट प्रतियोगितामा सय गोल पूरा भएको छ । लिगको सयौँ गोल गर्ने खेलाडी संकटा क्लबकी सेनु परियार बनेकी छिन् । कैलालीको लम्की फुटबल एन्ड ट्रेनिङ एकेडेमीलाई संकटा क्लबले ६–१ ले हराएसँगै लिगमा एक सय गोल पूरा भयो । यसअघि लिगमा पहिलो गोल काठमाडौंको छहारी क्लबकी ललिता मण्डलले गरेकी थिइन् । यो खेलमा छहारीले भक्तपुरको एफसी रियलेलाई ३–० ले हरायो ।

२९ साउन ०८२ बाट सुरु भएको लिगमा सबैभन्दा ठुलो जित ८–३ को निस्केको छ । ११ गोल भएको खेलमा कास्कीको आरएस रिसोर्ट एन्ड बिच फुटबल क्लबले सिन्धुपाल्चोक एफसीलाई हराएको हो । यो खेलमा सरिता विकले ह्याट्रिकसहित चार गोल गरेकी थिइन् । लिगमा जम्मा चार ह्याट्रिक भएका छन् ।

यस्तै, महिला लिगमा पहिलो ह्याट्रिक पूरा गर्ने खेलाडी सविना तामाङ हुन् । सिन्धुपाल्चोककी सविनाले लिगको पाँचौँ खेलमा ह्याट्रिक गर्दा काठमाडौंको स्टुडेन्ट फुटबल क्लब ३–१ ले पराजित भयो । छैटौँ खेलमा झापा एफसीकी इमा राईले ह्याट्रिक गरिन् । उनले ह्याट्रिक गर्दा झापाले कास्कीको नेपाल बेस्ट म्यानेजमेन्ट महिला टिमलाई ७–० ले हराएको थियो । अर्काे ह्याट्रिक गर्न खेलाडी न्युरोड टिम एनआरटीकी सजिना स्याङ्तान हुन् । उनले लम्कीलाई ७–२ ले हराउँदा तीन गोल गरेकी थिइन् ।

अखिल नेपाल फुटबल संघ (एन्फा)ले फिफाको सहयोगमा आयोजना गरेको लिगबाट शीर्ष पाँच टोली सीधै महिला लिगमा छनोट हुनेछन् । महिला लिगमा यसअघिकै पाँच टिम छन् । जसमा विभागीय तीन टोली र वालिङ नगरपालिका तथा बागमती युवा क्लब छन् । महिला लिग छनोटमा संकटा दोस्रोपटक सहभागी भएको हो । यसपटक संकटासहित सहिद स्मारक ‘ए’ डिभिजन लिगबाट चर्च ब्वाइज युनाइटेड र एनआरटी सहभागी भए । यस्तै, फ्रेन्चाइज लिग नेपाल सुपर लिग खेलिरहेका झापा एफसी र बुटवल लुम्बिनी पनि महिला लिग खेल्ने योजनासहित छनोटमा सहभागी भएका छन् ।

संकटा, एनआरटी र चर्च ब्वाइज छनोटतर्फ
सहिद स्मारक ‘ए’ डिभिजन लिग क्लबको प्रतिनिधित्व गरेका संकटा, न्युरोड टिम एनआरटी र चर्च ब्वाइज युनाइटेड महिला लिगतर्फ अगाडि बढेका छन् । संकटा लगातार दोस्रोपटक लिग खेल्ने तरखरमा छ । एनआरटी र चर्च ब्वाइज पनि पहिलो सहभागितामै छनोट हुनेतर्फ छन् ।

संकटाले खेलेको चारै खेलमा जित निकालेको छ । उसले समूह ‘बी’मा चार खेलबाट १२ अंक जोडेको छ । उसले पहिला खेलमा नेपाल खेलकुदलाई १–०, दोस्रो खेलमा झापालाई ४–०, तेस्रो खेलमा बुटवल लुम्बिनीलाई ३–० र लम्कीलाई ६–१ ले हराएको हो । यता, एनआरटीले पनि चारमध्ये तीन खेल जित्दै सम्भावना निकै बलियो बनाएको छ । टोलीले पहिलो खेलमा नेपाल खेलुकदलाई ३–१, दोस्रो खेलमा लम्कीलाई ७–२ ले हराउँदा तेस्रो खेलमा भने झापासँग २–१ ले पराजित भयो ।

तेस्रो खेलमा पोखरा एनबिएमलाई ७–० ले हराउँदै समूह ‘बी’बाट सम्भावना कामय राखेको छ । त्यस्तै, चर्च ब्वाइजले पनि चारमा चार खेल जित्दै महिला लिग खेल्न उत्सुक रहेको जनाएको छ । समूह ‘ए’ मा सबै खेल जितेको चर्च दुई अंकसहित शीर्ष स्थानमा छ । पछिल्लोपटक शीर्ष डिभिजन लिग जितेको चर्च ब्वाइजले पहिलो खेलमा एफसी रियलेलाई ६–०, दोस्रो खेलमा आरसी रिसोर्टलाई १–०, तेस्रो खेलमा स्टुडेन्ट्सलाई ४–० र चौथो खेलमा सिन्धुपाल्चोकलाई ७–१ ले हराएको हो ।

प्रतियोगिताको नियमावलीअनुसार दुई समूहका शीर्ष दुई टोली सीधै महिला लिगमा छनोट हुनेछन् । दुई समूहका तेस्रोबिच हुने खेलको विजेता पाँचौँ टोलीको रूपमा सीधै फाइनल चरणमा स्थान बनाउनेछ ।