- वि.सं २o८२ भदौ १५ आइतबार
एमाले नेतृत्वले पूर्वराष्ट्रपति विद्या भण्डारीलाई पार्टीमा ढोका बन्द गरे पनि सार्वजनिक रूपमै एमाले नेता–कार्यकर्ता उनको पक्षमा उभिने क्रम बढ्दै गएको छ । शनिबार मधेश पुगेकी भण्डारीलाई बाराको सिमरा विमानस्थलमा एमाले स्थायी किमिटी र पोलिटब्युरो सदस्यदेखि स्थानीय जनप्रतिनिधिसम्मले भव्य स्वागत गरे । विमानस्थल पुगेका एमाले नेता–कार्यकर्ताले ५१ केजीको माला लगाइदिएर भण्डारीप्रति समर्थन रहेको सन्देश नेतृत्वलाई दिएका छन् ।
वीरगन्ज उद्योग वाणिज्य संघको आयोजनामा भएको ‘बृहत् महिला सम्मेलन : नारी शक्ति समर्पण र सम्मान’ विषयक महिला सम्मेलनमा उपस्थित हुन भण्डारी सिमरा विमानस्थल हुँदै गएकी थिइन् । विमानस्थलमा उनलाई एमाले स्थायी कमिटी सदस्य मुकुन्द न्यौपाने, पोलिटब्युरो सदस्य पुरुषोत्तम पौडेल, मधेश प्रदेश सचिवालय सदस्य जयप्रकाश थारू, केन्द्रीय सदस्य केदार न्यौपाने र अरविन्द सिंह, मधेश प्रदेश सचिव मनोज पौडेल, वीरगन्ज महानगरका पार्टी अध्यक्ष नवराज शर्मा, बाराको जितपुर सिमरा उपमहानगरपालिकाका उपमेयर भोलाप्रसाद अधिकारीलगायतले स्वागत गरेका थिए । पार्टी नेतृत्वले भण्डारीको सदस्यताको विषयलाई लिएर कुनै पनि बहसमा सहभागी नहुन निर्देशन दिएको थियो ।
स्वागतमा सहभागी पोलिटब्युरो सदस्य पौडेलले देशकै सम्मानित व्यक्तिलाई स्वागतमा कुनै पार्टीले रोक लगाउन नसक्ने बताए । ‘देशकै सम्मानित व्यक्तिलाई स्वागतमा कुनै पार्टीले रोक लगाउन सक्दैन, गणतन्त्रमा सबैलाई भेटघाट र स्वागत गर्न सकिन्छ,’ उनले भने, ‘हामीले स्वेच्छाले नै उहाँलाई स्वागत र भेटघाट गरेका हौँ ।’ स्वागत र भेटघाट नगर्न भनेर पार्टीले पनि नभनेको उनको भनाइ छ । एमाले मधेश प्रदेश सचिवालय सदस्य थारूले पूर्वराष्ट्रपति भण्डारीलाई ५१ केजीको माला लगाइदिएर सम्मान गरिएको बताए । उनले पनि देशकै सम्मानित व्यक्तिलाई भेट्न कसैले रोक लगाउन नसक्ने बताए ।
वीरगन्जको कार्यक्रममा भण्डारीले महिलाहरू देशको नेतृत्व गर्न, उद्यम सञ्चालन गर्न र समाज परिवर्तनका लागि अब्बल रहेको बताइन् । समाजमा बाँकी रहेको लैंगिक असमानता हटाउन महिलाले नेतृत्व लिनुपर्ने उनको भनाइ छ ।
एमाले पोलिटब्युरो सदस्य पुरुषोत्तम पौडेलले भने–देशकै सम्मानित व्यक्तिको स्वागतमा कुनै पार्टीले रोक लगाउन सक्दैन
देशकै सम्मानित व्यक्तिको स्वागतमा कुनै पार्टीले रोक लगाउन सक्दैन, गणतन्त्रमा सबैलाई भेटघाट र स्वागत गर्न सकिन्छ । हामीले स्वेच्छाले नै उहाँलाई स्वागत र भेटघाट गरेका हौँ । स्वागत र भेटघाट नगर्न भनेर पार्टीले पनि भनेको छैन ।
