- वि.सं Invalid date format
‘गजल, संगीत र ललितकला उत्सव’ सम्पन्न भएको छ। गजलको विकास, विस्तार र परिष्कारमा सक्रिय संस्थाहरू अनाममण्डली र अन्तर्राष्ट्रिय नेपाली गजल मञ्च तथा नेपाली संगीत प्रवर्द्धनमा क्रियाशील गोल्डेन क्रियसनको आयोजनामा उक्त उत्सव भएको हो।
उत्सवमा नेपाल प्रज्ञा प्रतिष्ठान, नेपाल संगीत तथा नाट्य प्रज्ञा प्रतिष्ठान र नेपाल ललितकला प्रज्ञा प्रतिष्ठानले सहकार्य गरेका छन्। उत्सवमा सातवटै प्रदेशका स्रष्टाका राष्ट्रिय भावमा लेखिएका गजलहरूलाई विश्व कीर्तिमानी संगीतकार सन्तोष श्रेष्ठले आफ्नै संगीत र स्वरमा प्रस्तुत गरेका थिए।
सुदूरपश्चिम प्रदेशबाट भुवन निस्तेज, कर्णालीबाट कुशलनाथ योगी, लुम्बिनीबाट सन्तोष श्रेष्ठ, गण्डकीबाट देवेन्द्र केसी ‘देवु’ बागमतीबाट राधा कँणेल, मधेशबाट विवश पौडेल र कोसीबाट रश्मि असफलका तथा आयोजक संस्था अनाममण्डलीका अध्यक्ष रूपक अलंकार र अन्तर्राष्ट्रिय नेपाली गजल मञ्चका अध्यक्ष घनेन्द्र ओझाका गजलहरू प्रस्तुत गरिएका थिए ।
गाइएका गजलहरूमा नेपाल ललितकला प्रज्ञाप्रतिष्ठानका कुलपति नारदमणि हार्तम्छाली, उपकुलपति लालकाजी लामा, सदस्यसचिव देवेन्द्रकुमार काफ्ले थुम्केली तथा प्राज्ञ परिषद् सदस्यहरू अरुणा हिङमाङ, सौरगंगा दर्शनधारी, संजय वान्तवा, प्रदीप अधिकारी (सुशान्त), दिनेश्वर महतो र पाल्सांमो लामाले चित्र बनाएका थिए ।
कार्यक्रम संयोजक तथा अन्तर्राष्ट्रिय नेपाली गजल मञ्चका अध्यक्ष ओझाले नेपाली वाङमयका तीन विधा गजल संगीत र साहित्यलाई एकै थलोमा प्रस्तुत गरिएको र त्यसमाथि राष्ट्रिय भावका गजलको गायन नेपालमै पहिलो भएको जानकारी दिए।
