कोशीमा ६ वटा पालिकाले फोहोरमैला प्रशोधन केन्द्र सञ्चालन गर्ने

कोशी प्रदेशको पहाडी जिल्ला इलामका दुई र तराई मोरङका चार पालिकाले संयुक्त्त रुपमा फोहोरमैला प्रशोधन केन्द्र सञ्चालन गर्ने भएका छन् । पहाडमा इलामको सुर्योदय नगरपालिका र रोङ गाउँपालिका, तराईमा मोरङको रंगेली,सुनवर्षी नगरपालिका, धनपालथान र कानेपोखरी गाउँपालिकाले साझेदारी लगानीमा संयुक्त्त रुपमा फोहोरमैला प्रशोधन केन्द्र सञ्चालन गर्ने भएका हुन् । 

इलामका पालिकाहरु सुर्योदयलाई कन्याम, फिक्कल र अन्तुडाँडामा आउने सयौँ पर्यटकहरुले गर्ने फोहोर व्यवस्थापन चुनौती बनिरहेको छ। रोङ गाउँपालिकालाई पनि सानो पाभिभरा दर्शन गर्न दैनिक आउने सयौँ भक्त्तालुहरुले गर्ने फोहोर व्यवस्थापन चुनौती बनेको छ। तराईको मोरङका  पालिकाहरु धनपालथान कानेपोखरी गाप अनि  रंगेली र सुनवर्षी नगरपालिकालाई चाँही साना बजार र गाउँगाउँमा लाग्ने  हाटबजारको फोहोर व्यवस्थापन चुनौती बनेको छ ।सँगै  सार्वजनिक र नीजि सवारीबाट यात्रुहरुले जथाभावी जंङल र खाली मैदानमा फाल्ने फोहोरमैला व्यवस्थापन गर्न  पनि चुनौती छ । स्थानीय र यात्रुहरुले फोहोरमैला जथाभावी जङगल र सडक किनारमा फालिदिँदा जंगल र सडक क्षेत्र दुर्गन्धित बनिरहेका छन्। 

यसैले कोशी प्रदेश सरकारको भौतिक पुर्वाधार विकास मन्त्रालय, कोशी सरकारको  स्विस परियोजना अनि पालिकाहरुको त्रिपक्षीय साझेदारीमा फोहोरमैला व्यवस्थापन तथा प्रशोधन केन्द्र स्थापना गरेर साझेदारीमा सञ्चालन गर्नेछन्। जसमा जग्गा प्रदान गर्ने र प्रशोधन केन्द्र निर्माणमा लाग्ने आधा लगानी पालिकाले बेहोर्नेछन भने  आधा लगानी भौतिक मन्त्रालयले बेहोर्नेछ  । स्विस सरकारको परियोजनाले चाँही प्राविधिक सहयोग गर्नेछ । संयुक्त्त साझेदारी फोहोरमैला प्रशोधन केन्द्र स्थापना गरेर सञ्चालन गर्ने समझदारी पत्रमा शुक्रबार कोशी सरकारको भौतिक पुर्वाधार मन्त्रालय र पालिका प्रमुख र अध्यक्षहरुबिच समझदारी पत्रमा हस्ताक्षर सम्पनन भएको छ। 

कोशी प्रदेश सरकारका भौतिक पुर्वाधार मन्त्री भुपेन्द्र राईका अनुसार सझदारी पत्रमा हस्ताक्षर भएसँगै अव फोहोर प्रशोधन केन्द्र स्थापनाका लागी विस्तृत परियोजना   प्रतिवेदन (डिपीआर)  तयार गरेर वातावरणीय प्रभाव मुल्यांङकन स्वीकृत गराएर निर्माण कार्य अगाडि बढ्नेछ ।  ‘पालिका र कोशी प्रदेश सरकारको फोहोरमैला साझेदारी कार्यक्रम नेपालमै नमुना भएकोले यसलाई जस्तोसुकै चुनौती मोलेर पनि सफल बनाउन सके संघीयता कार्यान्वयमा कोसेढुंगा सावित हुने छ’ , भौतिक मन्त्री भुपेन्द्र राईले भने ।