सन् २०२५ मा सन्न्यास लिएका चर्चित क्रिकेटर

राष्ट्रिय क्रिकेट टोलीमा लामो समयदेखि स्थान बनाउन नसक्दा यस वर्ष चर्चित क्रिकेटरहरूले सन्न्यास लिएका छन् । सन् २०२५ को जनवरीदेखि अगस्टसम्म विभिन्न राष्ट्रका गरी आठ क्रिकेटरले सबै फम्र्याटबाट सन्न्यास घोषणा गरे । वेस्ट इन्डिजलाई यसले प्रत्यक्ष असर गरेको छ । अर्को वर्ष भारत र श्रीलंकाले संयुक्त रूपमा आइसिसी पुरुष टी–२० विश्वकप क्रिकेट प्रतियोगिता आयोजना गर्दै छन् । वेस्ट इन्डिजले एन्ड्रेस रसेल तथा निकोलास पुरनलाई सम्भावित खेलाडीका रूपमा राखेको थियो । तर, यी दुवै महत्वपूर्ण खेलाडी नहुँदा अब वेस्ट इन्डिज युवा खेलाडीको भरमा पुगेको छ । उसलाई अलराउन्डर भूमिका निर्वाह गर्न सक्ने खेलाडीको खाँचो परेको छ । भारतका चेतेश्वर पुजारा पनि टोलीमा नपरेपछि फ्रेन्चाइज लिगमा केन्द्रित हुन क्रिकेटबाट बिदा भए । न्युजिल्यान्डका बायाँहाते ब्याट्सम्यान मार्टिन गुप्तिल दुई वर्षदेखि टोलीमा छैनन् । उनी पछिल्लो समयमा टी–२० फम्र्याटमै व्यस्त देखिए । फ्रेन्चाइज टी–२० मा केन्द्रित हुनकै लागि उनले राष्ट्रिय टोलीबाट बिदा लिएका हुन् । बंगलादेशबाट निरन्तर क्रिकेट खेल्दै आइरहेका तमिल इक्वालले पनि सन्न्यास घोषणा गरे । सन्न्यास लिएका आठ खेलाडी यस्ता छन् :

चेतश्वर पुजारा (भारत) : भारतका टेस्ट खेलाडी पुजाराले गत आइतबार तीनै फम्र्याटबाट अप्रत्याशित रूपमा सन्न्यास लिएको घोषणा गरे । यद्यपि, उनले लामो समयदेखि भारतको टोलीमा नियमित रूपमा स्थान बनाउन सकेका थिएनन् । उनले अन्तिमपटक सन् २०२३ मा भारतका लागि टेस्ट खेलेका थिए । टेस्ट फम्र्याटमा पुजारा मध्यक्रममा पछिल्लो समयमा अब्बल ब्याट्सम्यान थिए । उनले टेस्टमा सात हजार एक सय ९५ रन बनाएका छन् । यस वर्ष क्रिकेटका सबै फम्र्याटबाट सन्न्यास लिने ११औँ खेलाडीसमेत हुन् । ३७ वर्षीय ब्याट्सम्यान पुजाराको विशेषत: धैर्यका साथ क्रिजमा लामो समयसम्म टिक्न सक्नु हो । दायाँहाते ब्याट्सम्यान पुजाराले भारतका लागि पहिलो खेल सन् २०१० मा अस्ट्रेलियाविरुद्ध खेलेका थिए ।

मार्टिन गुप्तिल (न्युजिल्यान्ड) : न्युजिल्यान्डका ३८ वर्षीय ओपनिङ ब्याट्सम्यान मार्टिनले यसै वर्ष सन्न्यास लिए । दायाँहाते खेलाडी मार्टिनले न्युजिल्यान्डका लागि अन्तिम खेल सन् २०२२ मा खेलेका हुन् । लगभग तीन वर्ष राष्ट्रिय टोलीमा नपरे पनि उनी विभिन्न अन्तर्राष्ट्रिय फ्रेन्चाइजमा आबद्ध थिए । उनले एकदिवसीय क्रिकेटमा सर्वाधिक एक सय ९८ खेल खेल्दा सात हजार तीन सय ४६ रन बनाए । उनले एकदिवसीय विश्वकपमा दोहोरो शतकको कीर्तिमान राखेका छन् । उनले ४७ टेस्ट र १२२ टी–२० खेल खेलेका छन् ।

हेनरिक क्लासेन (दक्षिण अफ्रिका) : दक्षिण अफ्रिकाका ३४ वर्षीय विकेटकिपर तथा ब्याट्सम्यान हेनरिक आक्रामक ब्याटिङका लागि चिनिन्छन् । उनले पनि यसै वर्ष क्रिकेटका तीनवटै फम्र्याटबाट सन्न्यासको घोषणा गरे । दायाँहाते ब्याट्सम्यानले सन् २०१८ बाट मात्रै अन्तर्राष्ट्रिय डेब्यु गरेका थिए । हेनरिकले सन् २०१८ मा भारतविरुद्ध डेब्युको अवसर पाए । सन् २०२५ मा उनले न्युजिल्यान्डविरुद्ध खेले । चार टेस्टमा अवसर पाएका हेनरिकले ६० एकदिवसीय र ५८ टी–२० आई खेलेका छन् ।

निकोलास पुरन (वेस्ट इन्डिज) : सन् २०२५ को सिजनमा वेस्ट इन्डिजबाट नाम चलेका खेलाडीले सन्न्यास लिने लहरै चल्यो । यस क्रममा निकोलासले सन्न्यास लिए । उनी सन् २०२४ देखि टोलीमा थिएनन् । आठ वर्षको अन्तर्राष्ट्रिय करिअरमा उनले ब्याटिङमा आफ्नो दक्षता देखाए । बायाँहाते ब्याट्सम्यान तथा विकेट किपरसमेत रहेका निकोलासले करिअरमा आइपिएलमै समय बिताए । वेस्ट इन्डिजबाट उनले एकपटक पनि टेस्ट खेल्न पाएनन् । सन् २०१६ मा पाकिस्तानविरुद्ध टी–२० आई खेल्दै उनले अन्तर्राष्ट्रिय डेब्यु गरेका थिए । टी–२० आईमा निकोलासले एक सय ६ खेलमा दुई हजार दुई सय ७५ रन बनाए । उनले वेस्ट इन्डिजबाट ६१ एकदिवसीय खेल खेले ।

आन्द्रे रसेल (वेस्ट इन्डिज) : अर्को वर्ष भारत र श्रीलंकाले संयुक्त रूपमा टी–२० विश्वकप आयोजना गर्दै छन् । विश्वकपअगाडि वेस्ट इन्डिजले ठुलो धक्का महसुस गर्‍यो । विश्वकपको सम्भावित टोलीमा पर्न सक्ने अलराउन्डर रसेलले अचानक सन्न्यास घोषणा गरे । सन् २०२५ मा अन्तिम टी–२० आई खेल्दै वेस्ट इन्डिजका पावर हिटरे रसेलले क्रिकेटबाट बिदा लिए । उनले किङ्सटनमा अस्ट्रेलियाविरुद्ध अन्तिम खेल खेले । यसअघि उनले सन् २०१० मा एक मात्रै टेस्ट श्रीलंकाविरुद्ध खेलेका थिए । रसेलले सन् २०११ एकदिवसीय र टी–२० मै डेब्युको अवसर पाए । वेस्ट इन्डिजको आक्रामक ब्याट्सम्यान अलराउन्डमा रसेलको सन्न्यासपछि एक महत्वपूर्ण खेलाडीको अभाव देखिएको छ । उनले ८६ टी–२० आई खेल्दै एक हजार एक सय २२ रन बनाए । बलिङमा एकदिवसीय खेलमा ७० विकेट लिएका छन् ।

दिमुथ करुनारत्ने (श्रीलंका) : ३७ वर्षीय श्रीलंकन दिमुथले गत महिना मात्रै सन्न्यास लिएका थिए । श्रीलंकाका लागि ओपनिङ गर्ने दिमुथ सन् २०११ देखि २०२५ सम्म अन्तर्राष्ट्रिय क्रिकेटमा सक्रिय देखिए । उनले श्रीलंकाका लागि एक सय टेस्ट खेलमा सात हजार दुई सय २२ रन बनाए । ५० एकदिवसीयमा उनले एक हजार तीन सय १६ रन जोडे । दिमुथले एकपटक पनि टी–२० आईमा डेब्यु अवसर पाएनन् । उनले सन् २०२३ मा भारतविरुद्ध एकदिवसीय खेलेका हुन् । यसै वर्ष उनले अस्ट्रेलियाविरुद्ध करिअरकै अन्तिम खेल खेले ।

तमिन इक्वाल (बंगलादेश) : बंगलादेशका सिनियर खेलाडीमध्ये इक्वाल पनि एक हुन् । सन् २००८ मै न्युजिल्यान्डविरुद्ध टेस्टमा अवसर पाएका उनले ०२३ को अप्रिलमा आयरल्यान्डविरुद्ध करिअरकै अन्तिम खेल खेले । राष्ट्रिय टोलीमा नपरे पनि पछिल्लो समयमा टी–२० सिरिजमा व्यस्त थिए । इक्वालले ७० टेस्टमा १० शतक र ३१ अर्धशतकको सहयोगमा पाँच हजार एक सय ३४ रन बनाएका छन् । यसैगरी २४३ एकदिवसीय खेलमा उनले १४ शतक तथा ५६ पटक अर्धशतकीय इनिङ्स खेले । यस क्रममा उनले आठ हजार तीन सय ५७ रन जोडे । बंगलादेशका लागि उनले ७८ टी–२० आईमा एक शतकको सहयोगमा एक हजार सात सय ५८ रन जोडे ।

सापुर जार्दान (अफगानिस्तान) : अफगानिस्तानको अन्तर्राष्ट्रिय खेलमा सफलता प्राप्त गर्ने सापुर पनि एक प्रमुख खेलाडी हुन् । सन् २००९ मा उनले नेदरल्यान्ड्ससँग एकदिवसीय खेलमा डेब्यु गरेका थिए । सन् २०१९ मा उनले अन्तिमपटक आयरल्यान्डविरुद्ध एकदिवसीय खेल खेलेका थिए । सन् २०१० मा उनले आयरल्याडसँगै टी–२० खेलमा डेब्यु गरे । सन् २०२० मा उनले आयरल्यान्डविरुद्ध करिअरकै अन्तिम खेल खेले । उनले ४४ एकदिवसीय खेलमा ४३ विकेट लिएका छन् । यसैगरी ३६ टी–२० आईमा उनले ३७ विकेट हात पारेका छन् । ब्याटिङ क्रममा उनले एकदिवसीयमा ६७ रन मात्र जोडे ।

एजेन्सीको सहयोगमा