- वि.सं २o८२ भदौ १४ शनिबार
नेपालले भैँसीको प्रशोधित मासु र कुरकुरे हाडसँगै दुग्धपदार्थको निर्यातमा पनि सहजीकरण गर्न चिनियाँ पक्षसँग संवाद गरेको छ । चीनको भन्सार प्रशासनका उपमन्त्री वाङ लिङजुन नेतृत्वको टोलीसँग नेपालका कृषि तथा पशुपक्षी विकासमन्त्री रामनाथ अधिकारी नेतृत्वको टोलीले छलफल गरेको हो ।
बैठकमा नेपालले गरेको आग्रहलाई चिनियाँ पक्षले सकारात्मक रूपमा लिएको जनाएको मन्त्रालयको दाबी छ । त्यस्तै, हेलेज साइलेज पशु आहारा निर्यातका लागि पनि द्विपक्षीय बैठकमा नेपालले कुरा राखेको छ ।
नेपालले कुखुराको मासु र पन्जा, तरकारी, सुन्तलाजन्य फलफूल, चिया तथा कफी र जडीबुटी निर्यातका लागि सक्षम रहेको र यसका लागि थप सहजीकरण गरिदिन पनि आग्रह गरेको छ ।
हाल नेपालबाट ३४ प्रकारका कृषि वस्तु ६१ वटा कम्पनीमार्फत निर्यात हुँदै आएको छ । त्यस्तै, हरियो घाँस हेलेज पाँचवटा कम्पनीमार्फत चीन निर्यात हुँदै आएको छ । बैठकमा चीनका भन्सार प्रशासनका उपमन्त्री वाङले चीनले नेपालबाट कृषि वस्तु निर्यातको विषयलाई उच्च महत्व दिएको बताए ।
