- वि.सं २o८२ श्रावण ७ बुधबार
ताप्लेजुङको उत्तरी क्षेत्रमा बाढीपहिरोले वितण्डा मच्चाएको छ । जसले गर्दा अहिले ताप्लेजुङको हिमाली क्षेत्रमा सडक सम्पर्क टुटेको छ । गएराति परेको अविरल वर्षाका कारण तमोर नदीमा आएको बाढीले तमोर नदीमाथि बनेको रानीपुल बगाएकाे छ । पुल बगाएपछि अब फक्ताङलुङ क्षेत्रको हिमाली बस्तीसँग सडक सम्पर्क टुटेको छ।
फक्ताङलुङ गाउँपालिका– ५ तापेथोक र सोही गाउँपालिकाको वडा नम्बर ६ लेलेपबिचमा बनेको रानीपुल गएराति आएको बाढीले बगाएपछि उत्तरी क्षेत्र सडक सञ्जालबाट विच्छेद भएको छ ।
हिमाली क्षेत्रका लेलेप, लेलेपको घुन्सा, ओलाङचुङगोलालगायतका गाउँहरू सडक सञ्जालबाट टाढिएका छन् । रेमिड हाइड्रो पावर कम्पनीले करिब पाँच वर्षअघि पाँच करोडमा निर्माण गरेको पुल गएराति तमोर नदीमा आएको बाढीले बगाएको फक्ताङलुङ गाउँपालिका वडा नम्बर- ५ का वडाध्यक्ष देउप्रसाद लिम्बूले जानकारी दिए ।
तीन घर पहिरोको जोखिममा
वडाध्यक्ष लिम्बूले सोही वडाको माथिल्लो गाउँ खाम्थाकमा तीन घर पहिरोको जोखिममा परेर विस्थापित भएको जानकारी दिए । उनले इन्द्रबहादुर तामाङ, दिलकुमार तामाङ तथा कृष्ण तामाङको घर जाेखिममा परेकाे बताए ।
रातभरि अविरल रूपमा परेको पानीले ताप्मावाखोलामा रहेको काठेपुलसमेत बगाएको छ । सो खोलाले मोटरेबल बाटोकाे साथै मानिस हिँड्ने बाटोसमेत बाढीले बगाएको छ । उता, गाउँपालिकाको केन्द्र तापेथोक जाने मोटरबाटोसमेत अवरुद्ध भएको छ । पालिकाछेउमा रहेको सिसंवाखोलामा रहेको काठेपुल र बाटोसमेत बाढीले बगाएको छ।
