- वि.सं २o८२ जेठ १३ मंगलबार
स्वास्थ्य तथा जनसंख्या मन्त्रालयले महामारी नियन्त्रणका लागि मनसुनजन्य विपत् सुरु हुनुअघि नै आवश्यक पूर्वतयारी तथा रोकथामका लागि तयारी थालेको छ।
वर्षायाममा विभिन्न संक्रमण, रोग तथा महामारीको सम्भावनालाई दृष्टिगत गरी स्वास्थ्य तथा जनसंख्यामन्त्री प्रदीप पौडेलले तयारी बैठक गरेर समयमै प्रतिकार्य तथा रोकथाम सम्बन्धमा ६ वटा निर्णय गरेका उनको निजी सचिवालयले जनाएको छ।
विपत् प्रतिकार्य तथा महमारी नियन्त्रणमा संलग्न स्वास्थ्य अधिकारीहरूसँग आज मंगलबार भएको बैठकमा मन्त्री पौडेलले स्वास्थ्य अधिकारीहरूलाई समस्या समयमा नै पहिचान गरेर तयारी गर्न निर्देशन दिए।
मन्त्री पौडेलको निजी सचिवालयका अनुसार अब महामारी रोकथाम तथा नियन्त्रणका लागि स्वास्थ्य सेवा विभागले इपिडिमियोलोजी तथा रोग नियन्त्रण महाशाखाअनुसार सम्भावित महामारी हुने स्थानको पहिचान गरी सरसफाइ, शुद्ध पानीको प्रयोग र व्यवस्थापनका लागि आवश्यक तयारी गर्नेछ।
साथै, शुद्ध पानीको प्रयोगका लागि स्थानीय तहसम्मै प्रभावकारी सूचना सामग्री सम्प्रेषणका लागि राष्ट्रिय स्वास्थ्य शिक्षा सूचना तथा सञ्चार केन्द्रले काम थाल्नेछ। इपिडिमियोलोजी तथा रोग नियन्त्रण महाशाखाले सबै स्थानीय तहका द्रुत प्रतिकार्य समूहसँग भर्चुअल बैठक गरेर आवश्यक सूचना संकलनका साथै तथा तयारी अघि बढाउनेछ।
महाशाखाले सातै प्रदेशमा स्वास्थ्यजन्य विपत् नियन्त्रणका लागि तालिमप्राप्त व्यक्तिको विवरण अद्यावधिक गरेर आवश्यकताअनुसार खटाउनेछ। यसैगरी, राष्ट्रिय आपतकालीन कार्य सञ्चालन केन्द्र तथा राष्ट्रिय तथा प्रादेशिक स्वास्थ्य आपतकालीन कार्य सञ्चालन केन्द्रसँग समन्वय गरी आवश्यक तयारी थालिनेछ।
‘संक्रामक रोग ऐन, २०२०’ लाई बदलिँदो परिस्थिति तथा आवश्यकताअनुसार संशोधन गर्न स्वास्थ्य सेवा विभागले एक साताभित्र आवश्यक तयारी गरेर मन्त्रालयमा पेस गर्ने निर्णय बैठकले गरेको छ।
