सुन्दरीजल क्षेत्रमा खानेपानी नदिएको भन्दै सांसदको आपत्ति

प्रतिनिधिसभाको आजको बैठकमा उपत्यकामा खानेपानी पठाउने सुन्दरीजल क्षेत्रमा खानेपानीको अभाव भएको भन्दै सांसदहरूले त्यस क्षेत्रमा स्वच्छ र शुद्ध खानेपानीको व्यवस्था मिलाउन सरकारको ध्यानाकर्षण गराएका छन्। बैठकको शून्य समयमा नेपाली कांग्रेसका सांसद सन्तोष चालिसेले सुन्दरीजल क्षेत्रमै खानेपानीको हाहाकार भएको बताए । सुन्दरीजलबाट चाबहिलसम्मका जनताले खानेपानी नपाएको गुनासो जनप्रतिनिधिसँग गरिरहेकाे जनाउँदै उनले उक्त समस्या यथाशीघ्र समाधान गर्न सम्बन्धित सरकारी निकायको ध्यानाकर्षण गराए।

‘मेलम्चीको पानी पनि सुन्दरीजलमा प्रशोधन गरी काठमाडौं उपत्यकामा वितरण हुन्छ। सुन्दरीजल क्षेत्रमा भने मेलम्चीको पानी वितरण गरिएको छैन । बागमतीको पानी विनाप्रशोधन धमिलो वितरण हुँदा स्थानीयवासी आक्रोशित भएका छन्,’ उनले भने । नेपाल कम्यनिस्ट पार्टी (एमाले) की सांसद सम्झना थपलियाले कमला नदी भत्किएकाले यात्राका क्रममा जनताले सास्ती खेपिरहेकाे भन्दै सरकारको ध्यान जानुपर्ने बताइन् । 
  
कांग्रेसकी सांसद सरस्वती बजिमयले वर्षायामको सुरुवात हुन लाग्दा बाढी, पहिरोलगायत विपत् हुने जोखिममा जनता त्रसित भएका भन्दै वैशाख २९ गतेको वर्षाले खोटाङ, भोजपुर, सोलुखुम्बु, ओखलढुंगालगायत जिल्लामा माथिबाट लेदो झरी सडक अवरुद्ध भएको बताइन्। वर्षा सुरु भएपछि उल्लेखित जिल्लाका बासिन्दालाई आवतजावत गर्न वैकल्पिक बाटोको व्यवस्था गर्न उनले सभामुखमार्फत सरकारको ध्यानाकर्षण गराइन्।

एमालेकी सांसद सरस्वती सुब्बाले जलवायु परिवर्तनले हिउँ पग्लनेदेखि हिमताल फुट्नेजस्ता जोखिम बढ्दै गएका बताउँदै जलवायु परिवर्तनका असरबारे समुदायदेखि राष्ट्रिय तथा अन्तरराष्ट्रिय तहमा देखिएका समस्या सम्बोधन हुने गरी सगरमाथा संवाद कार्यक्रम सञ्चालन गर्नुपर्नेमा जोड दिइन् । एमालेका सांसद सराज अहमद फारुकीले प्राथमिक स्वास्थ्य सेवा सुदृढीकरण, ग्रामीण तथा दुर्गम क्षेत्रमा स्वास्थ्य चौकीमा स्थानीयको पहुँच बढाउन, स्वास्थ्यकर्मीको क्षमता व्यवस्थापन, नियमित तालिमको व्यवस्थालगायत काम स्वास्थ्य मन्त्रालय प्रभावकारी रूपमा गर्नुपर्नेमा जोड दिए । 
  
एमालेकी सांसद सरिता भुसालले गण्डकी प्रदेशलाई भारतीय नाकासँग जोड्ने दुम्कीबास–त्रिवेणी खण्डको ट्र्याक २०६२ सालमा खनिए पनि अझै सम्पन्न हुन नसकेकाले यो सडक यथाशीघ्र निर्माण गर्न माग गरिन्। संघीयताको कार्यान्वयनसँगै सुस्ता पालिकाका केही भूभाग गण्डकी प्रदेशले विनय त्रिवेणी पालिकामा समायोजन गरेपछि त्यहाँका वडा नं. ६ र ७ का बासिन्दालाई सडक अभाव भएकाले सरकारलाई यसतर्फ ध्यान दिन उनले आग्रह गरिन् ।