तामाङ घेदुङको भव्य भवन बनाइदिने भनेर कुयाङले यसरी डुबाए दुई हजार बचतकर्ताको आठ अर्ब

आइडल यमुना सहकारी हिनामिना प्रकरण

नेपाल तामाङ घेदुङका अध्यक्ष मोहन गोले भन्छन्–तामाङ समुदायबाट मात्रै चार अर्ब संकलन गर्न सकिने र संस्था रातारात मालामाल हुने प्रलोभनपछि कुयाङको योजनामा सहकारी खोल्यौँ । तर, संकलित रकम हाम्रो सहकारीमा राखिएन । लगेर कुयाङकै सहकारीमा राखियो । गल्ती त्यही भयो । कुयाङले संकलित सबै रकम डुबाए ।

सहकारीमार्फत चार अर्ब रुपैयाँ संकलन गरेर चाँडै धनी बन्ने प्रलोभनपछि नेपाल तामाङ घेदुङका अध्यक्ष मोहन गोलेले कुयाङ छुयाङ दोर्जी लामालाई आइडल यमुना बहुउद्देश्यीय सहकारीबाट हर्षोल्लासका साथ घेदुङमा भित्र्याए । तर, उनै कुयाङका कारण गोले मात्रै होइन, संस्थाका अन्य पदाधिकारीसमेत भूमिगत हुनुपर्ने अवस्थामा पुगेका छन्।

कुयाङकै योजनामा घेदुङका अध्यक्ष गोलेसहितको टोलीले ‘घेदुङ सहकारी’ नामको संस्थागत सहकारी खोले । विभिन्न देशका तामाङ समुदायबाट रकम संकलन गरे । तर, संकलित रकम घेदुङमा नराखी कुयाङ नेतृत्वको आइडल यमुनामा राखियो । लगानी गर्ने सर्तमा कुयाङले संकलित रकम आइडल यमुनामा लगेका थिए । तर, उनले सबै संकलित रकमको दुरुपयोग गरेपछि घेदुङका अध्यक्ष गोलेसहित सहअध्यक्ष कुमारसिंह घिसिङ, उपाध्यक्ष महितकुमार तामाङ र कोषाध्यक्ष रूपबहादुर योञ्जन फस्न पुगेका छन्। 

‘तामाङ समुदायबाट मात्रै चार अर्ब संकलन गर्न सकिने र संस्था रातारात मालामाल हुने प्रलोभनपछि कुयाङको योजनामा सहकारी खोल्यौँ । तर, संकलित रकम हाम्रो सहकारीमा राखिएन । लगेर कुयाङकै सहकारीमा राखियो । गल्ती त्यही भयो । कुयाङले संकलित सबै रकम डुबाए । हामी घर न घाटको त भयौँ नै, अहिले आफ्नै समुदायमा भूमिगत हुनुपर्ने अवस्था आइलाग्यो,’ गोलेले भने ।

आइडल यमुनाले पछिल्लोपटक दुई हजार बचतकर्ताको आठ अर्ब रुपैयाँ अपचलन गरेको पाइएको छ । अपचलनमा संलग्नमध्ये सञ्चालक केबी उप्रेती पक्राउ परेका छन् । कुयाङ भने फरार छन् । घेदुङ सहकारीको डुबेको सोहीमध्येको रकम हो । घेदुङका अध्यक्ष गोलेका अनुसार कुयाङले घेदुङ सहकारीअन्तर्गत करिब चार सय बचतकर्ताको पाँच करोडभन्दा धेरै रकम डुबाए । त्यसबाहेक तामाङ घेदुङको ७५ लाख, आजीवन सदस्यबापत संकलन भएको १३ लाख, अक्षयकोषको सात लाख, भाषा विकासअन्तर्गत दुई लाख ५० हजार, तामाङ घेदुङ इजरायलको ३१ लाख र तामाङ घेदुङ साइप्रसको १५ लाख घेदुङ सहकारी हुँदै आइडल यमुनामा राखिएको थियो । सबै रकम डुब्न पुग्यो ।  

‘आइडल यमुना र घेदुङ सहकारीबीचको ‘ट्रान्ज्याक्सन’ हेर्दा १४ करोड ८७ लाख १८ हजार तीन सय ३९ रुपैयाँ भएको देखिन्छ । जसमध्ये बचतकर्ता मात्रै करिब चार सय थिए । उनीहरूबाट पाँच करोडभन्दा धेरै रकम संकलन भएको थियो । त्यसबाहेकका रकम पनि घेदुङ सहकारी हुँदै आइडल यमुनामा राखिएको थियो । सबै गरी सात करोडभन्दा धेरै रकम कुयाङले डुबाइदियो,’ अध्यक्ष गोलेले भने ।

तामाङ घेदुङ विसं २०१३ देखि सञ्चालनमा छ । तर, निजी भवन नहुँदा नेतृत्वले सधैँ दबाब झेल्दै आएको थियो । यही क्रममा एक लाख रुपैयाँ सहयोग घोषणासहित कुयाङ घेदुङमा भित्रिए । लाखबाट सुरु भएको खेलो अर्बमा पुगिसकेको थियो । त्यसो हुँदा उनलाई ठूलो रकमको आवश्यकता थियो । जसका लागि उनले तामाङ समुदायलाई प्रभावित पार्ने र सहकारीको आवरणमा रकम संकलन गर्ने योजना बनाए । घेदुङमा उनको प्रवेश सोही योजना कार्यान्वयनका लागि थियो । उनले घेदुङको नेतृत्वसँग सहकारी खोल्ने प्रस्ताव गरे । चार अर्ब रुपैयाँ संकलन हुने र संस्थाको भव्य भवन पनि बन्ने प्रलोभनपछि घेदुङको नेतृत्व कुयाङको जालमा सहजै फस्यो । कुयाङले घेदुङकै मातहतमा रहने गरी ‘घेदुङ सहकारी’ दर्ता गरे । सहकारीको पदाधिकारीमा तामाङ घेदुङका अध्यक्ष गोले, सहअध्यक्ष घिसिङ, उपाध्यक्ष तामाङ, कोषाध्यक्ष योञ्जनसहितलाई राखे । आफू सहकारीको व्यवस्थापकमा बसे । जबकि उनी त्यसवेला आइडल यमुनाका अध्यक्ष थिए । कानुनअनुसार एकै व्यक्ति दुई सहकारीको अध्यक्ष र व्यवस्थापक बन्न पाइँदैन । 

सहकारी सञ्चालनका लागि कुयाङले आफूमातहतका कर्मचारी भटाभट नियुक्त गरे । घेदुङ सहकारीको नाममा रकम संकलन हुन थाल्यो । तर, कुयाङले संकलित रकम घेदुङमा नराखी आफू नेतृत्वको आइडल यमुनामा राख्न थाले । गतिविधि शंकास्पद देखिन थालेपछि सहकारीका पदाधिकारीले प्रश्न गर्न थाले । जवाफमा उनले सहकारी डुबाइदिने धम्की दिन थाले । र, प्रलोभन बाँड्ने क्रमलाई अझ तीव्रता दिए । सहकारीमा कर्मचारी कुयाङकै थिए । संकलित सबै रकम उनकै कब्जामा थियो । त्यसकारण पदाधिकारीहरू कुयाङविरुद्ध खरो तवरले उत्रन सकेनन् । 

नेपाल तामाङ घेदुङका कोषाध्यक्ष योञ्जनले भने, ‘कुयाङले संस्थालाई सुरुमा एक लाख दिन्छु भन्यो । पछि त १० लाख नै दिने भनेर चेक काट्यो । जसमध्ये संस्थाले उनीबाट हालसम्म एक रुपैयाँ पनि प्राप्त गर्न सकेन । बदलामा उनले सहकारी डुबाइदिए । सहकारीको पदाधिकारी हामी छौँ । बचतकर्ता र कानुनले चिन्ने हामीलाई हो । कुयाङविरुद्ध पक्राउ पुर्जी जारी भइसकेको छ । हामीविरुद्ध पनि पक्राउ पुर्जी आउने क्रममा रहेको सूचना छ । भत्ताबापतको केही रकमबाहेक सहकारीको हामीले एक रुपैयाँ चलाउन पाएनौँ । तर, कुयाङका कारण हामीमाथि नखाएको विष लाग्ने अवस्था आयो ।’