मुख्य समाचार प्रिन्ट संस्करण

रास्वपाको सिंगो शक्ति इलाममा, सभापति एवं गृहमन्त्री लामिछाने घरदैलोमा

१५ वैशाखमा हुन लागेकाे उपनिर्वाचनकाे प्रचार प्रसार एवं घरदैलो कार्यक्रमको लागि राष्ट्रिय स्वतन्त्र पार्टीको सिंगो शक्ति अहिले इलाममा छ । उपप्रधानमन्त्री एवं गृहमन्त्रीसमेत रहेका रास्वपा सभापति रवि लामिछाने चार दिनयता इलामको गाउँ–गाउँमा आफ्ना उम्मेदवार मिलन लिम्बूलाई जिताउन अपिल गर्दै मत माग्दै हिँडिरहेका छन् ।

यसअघि तीनवटा क्षेत्रमा भएको उपनिर्वाचनमध्ये दुईमा जित निकालेर उत्साहित भएको रास्वपा यसपटक इलाम २ मा जित निकाल्ने दाउमा छ । रास्वपा इलामको उपनिर्वाचनमा जित निकाल्दै पूर्वमा उदयको उद्घोष गर्न चाहन्छ । तसर्थ, उसले सिंगो शक्ति इलाममा केन्द्रित गरेको छ । 

सभापति लामिछानेसँगै उपसभापति स्वर्णिम वाग्ले, डिपी अर्याल, सांसद तोसिमा कार्की, सन्तोष परियार, निशा डाँगी, खेलकुदमन्त्री विराजभक्त श्रेष्ठलगायत नेताहरू इलाममा छन् । यस्तै, यसअघि शिक्षामन्त्री सुमना श्रेष्ठ, सांसद हरि ढकाल, मनीष झा, विन्दबासिनी कंसाकारगायतका नेता पनि इलाम आएका थिए ।

‘हाम्रो चुनावी अभियान राम्रो भइरहेको छ । यसपटक जनताले मत बदल्ने प्रतिक्रिया दिइरहनुभएको छ,’ रास्वपा सहमहामन्त्री कविन्द्र बुर्लाकोटीले भने, ‘पार्टी सभापति उम्मेदवार मिलन लिम्बूसँगै हिँडेर मत मागिरहनुभएको छ । अरू नेताहरूले फरक–फरक ठाउँमा रास्वपा उम्मेदवारका लागि मत मागिरहनुभएको छ ।’