विश्व प्रिन्ट संस्करण

‘सरकारले बैंक खाता रोक्का गरेपछि चुनाव प्रचारका लागि पैसाको अभाव’

 सरकारले आफ्नो दलको बैंक खाता रोक्का गरेपछि आगामी महिना सुरु हुने आमचुनावमा प्रचारप्रसारका लागि भारतको विपक्षी दल भारतीय राष्ट्रिय कंग्रेससँग पैसा नभएको यसका नेताले बताएका छन् । कर विवरण दाखिल गर्न ढिला भएको भन्दै गत फेब्रुअरीमा पार्टीका धेरै बैंक खाता रोक्का गरिएको थियो ।

‘हाम्रो दलको सम्पूर्ण आर्थिक आधार रोकिएको छ,’ स्वतन्त्रतापछि दशकौँसम्म भारतीय राजनीतिमा प्रभुत्व जमाएका नेहरू–गान्धी परिवारका सदस्य तथा कंग्रेस नेता राहुल गान्धीले भने । त्रिपन्न वर्षीय गान्धीले भने, ‘हामीसँग प्रचारका लागि पैसा छैन । हामी हाम्रा उम्मेदवारलाई सहयोग गर्न सक्ने स्थितिमा समेत छैनौँ । सरकारको नीतिका कारण चुनाव लड्ने हाम्रो क्षमतामा क्षति पुगेको छ ।’ प्रधानमन्त्री नरेन्द्र मोदीले उनको दललाई चुनौती दिन सक्ने दलविरुद्ध कर विभाग प्रयोग गरेको गान्धीले आरोप लगाए । 

‘गत हप्ता हामीलाई कर अधिकारीबाट सन् १९९५ देखि सन् १९९६ सम्मको ‘फाइलिङ’को अर्को सूचना प्राप्त भएको छ,’ गान्धीले नयाँ दिल्लीमा पत्रकार भेटघाटमा भने । ‘हामीसँग प्रचार सामग्री छाप्ने पैसासमेत छैन,’ उनले थपे । कंग्रेसकी पूर्वअध्यक्ष तथा राहुलकी आमा ७७ वर्षीया सोनिया गान्धीले पार्टीलाई पंगु बनाउने प्रणालीगत प्रयासको हिस्साका रूपमा कर जरिवाना प्रयोग गरिएको बताइन् ।

कंग्रेसका अध्यक्ष मल्लिकार्जुन खड्गेले पनि आर्थिक अभावका कारण चुनावअघि कंग्रेस ‘असहाय’ भएको बताए । निर्वाचन आयोगलाई दिइएको पछिल्लो आधिकारिक वित्तीय विवरणअनुसार भाजपाको कोष कंग्रेसको भन्दा करिब १० गुणा बढी छ । सन् २०१७ मा मोदी सरकारले ‘इलेक्टोरल बन्ड’ लागू गरेपछि यो खाडल नाटकीय रूपमा फराकिलो भएको थियो । गत महिना सर्वोच्च अदालतले यो योजनालाई असंवैधानिक ठहर गर्दै दाता र प्राप्तकर्ताको विवरण सार्वजनिक गर्न भनेको थियो ।