- वि.सं २o८१ जेठ २ बुधबार
प्रसिद्ध धार्मिक तथा पर्यटकीय स्थल रेसुंगामा भीषण आगलागी भएको छ । मंगलबार साझ उर्लेनीतिरको भिरबाट सुरु भएको आगो हावाका कारण फैलिएर रेसुंगाको शिरतिर फैलिएको छ ।
उर्लेनी क्षेत्रमा दुईवटा बस्तीमा करिब ४० घर परिवार छन् । सुरुमा वनको आगो बस्ती आउन सक्ने भएकाले सशस्त्र प्रहरी परिचालन भएको थियो । बस्तीमाथि आगलागी भएकाले हावा चले जोखिम हुने रेसुंगा नगरपालिका– १३ का पूर्ववडाध्यक्ष खुम खत्रीले जानकारी दिए ।
आगलागीका कारण रेसुंगा क्षेत्रमा रहेको भ्यु टावर, रेडियो नेपालको टावर, एनसेल टावर, सिद्धबाबा मन्दिरलगायतका संरचना जोखिममा पर्ने देखिएको छ ।
आगोको क्षतिबाट संरचना जोगाउन नेपाली सेना, सशस्त्र प्रहरी र नेपाल प्रहरीसहितको सुरक्षाकर्मीको टोली रेसुंगा क्षेत्रमा परिचालन भएको जिल्ला प्रशासन कार्यालयका सहायक प्रमुख जिल्ला अधिकारी हरिप्रसाद गैरेले जानकारी दिए ।
लामो समयको सुख्खा र गर्मी बढेकाले आगलागीका घटना सुरु भएका छन् । रेसुंगामा बर्सेनि आगलागी हुने गरेको छ ।
