नवनियुक्त शिक्षामन्त्री सुमना श्रेष्ठले कार्यभार सम्हालेकी छिन्।
राष्ट्रपति कार्यालय शीतलनिवासमा आज आयोजित विशेष समारोहमा राष्ट्रपति रामचन्द्र पौडेलबाट पद तथा गोपनीयताको शपथग्रहण गरेपछि सिंहदरबारस्थित शिक्षा मन्त्रालय पुगेर उनले कार्यभार सम्हालेकी हुन्।
रास्वपाकी समानुपातिक सांसद श्रेष्ठ पहिलोपटक मन्त्री बनेकी हुन्। प्रतिनिधिसभामा उनले प्राप्त गरेका जिम्मेवारीमा छोटो अवधिमै उनले प्रभावकारी कार्यसम्पादन गरेर सक्रिय सांसदका रूपमा आफूलाई स्थापित गरिसकेकी छिन्।
यसअघि शिक्षा क्षेत्रको सुधारको पक्षमा उनले निरन्तर सरकारलाई खबरदारी गर्दै आएकी थिइन्। प्रधानमन्त्री र तत्कालीन शिक्षामन्त्रीहरूलाई कडा कडा प्रश्न सोध्ने सुमना आफैँ जवाफ दिने स्थानमा पुगेकी छिन्।