अन्तर्वार्ता डिजिटल संस्करण

पछिल्लाे समीकरण सकारात्मक राजनीतिक ध्रुवीकरण : उपाध्यक्ष भुसाल

पछिल्लो राजनीतिक समीकरण बनेसँगै राजनीतिक वृत्तमा विभिन्न प्रकारका प्रतिक्रिया सार्वजनिक हुँदै आएका छन्। सरकारको समीकरण बदलिएसँगै पछिल्लो राजनीतिक अवस्थाबारे नेकपा माओवादी केन्द्रका उपाध्यक्ष एवं पूर्वमन्त्री पम्फा भुसालसँग गरिएकाे संक्षिप्त कुराकानी : 

प्रश्नः समीकरण परिवर्तनको विषयलाई लिएर विभिन्न टीका–टिप्पणी गरिएका छन्, पछिल्लो घटनाक्रमलाई कसरी लिनुभएको छ ?

पछिल्लो सत्तासमीकरण हाम्रो देशको नितान्त आन्तरिक विषय हो। यसमा कुनै बाह्य शक्तिको भूमिका छ भन्ने कुरा सोच्न पनि सकिन्न। सरकारभित्र आबद्ध भएका दलको कामको अप्ठ्यारोलाई ध्यानमा राखेर विकसित भएको घटना हो यो। नेपालमा हुने हरेक राजनीतिक घटनामा विदेशीलाई जोड्ने गरिन्छ, त्यो गलत हो। पछिल्लो राजनीतिक घटनाक्रम विशुद्ध आन्तरिक उपक्रम हो। यो नयाँ गठबन्धनले छिमेकी मित्रराष्ट्र तथा विश्वसमुदायसँग अझै घनिष्ट सम्बन्ध कायम गरी आफ्नो कामकारबाही अगाडि बढाउँछ । मित्रराष्ट्रसँगको सम्बन्ध अत्यन्त सुदृढ भएर जानेछ।
 
प्रश्नः छिटोछिटो समीकरण परिवर्तन हुँदा राजनीतिक अस्थिरता बढ्यो भन्ने टिप्पणी हुँदै आएको छ नि ?

तत्कालका लागि केन्द्र र प्रदेशका सरकारमा केही फेरबदल हुँदा त्यस्तो देखिएला, तर दीर्घकालमा यो एकप्रकारको सकारात्मक राजनीतिक ध्रुवीकरण हो। यसले राजनीतिमा दिगोपना ल्याउँछ। विगतमा भएको वाम ध्रुवीकरणलाई टिकाउन नसकिएको अवस्थालाई आत्मसात् गरी आत्मसमीक्षा र कमीकमजोरी सुधार गर्दै यो ध्रुवीकरण अगाडि बढ्छ र राजनीतिक स्थायित्वको दिशामा मुलुकलाई लैजान्छ। यो देशमा वाम धार बलियो भयो भने राजनीतिक स्थायित्व हुन्छ। त्यसैले तत्काल अस्थिरजस्तो देखिए पनि दीर्घकालमा यसले राजनीतिक स्थायित्व कायम गर्छ। पछिल्लो राजनीतिक समीकरण यो देशका लागि र राजनीतिक स्थिरताका लागि महत्वपूर्ण कदम हुनेछ।
 
प्रश्नः सत्तासमीकरणमा आएको बदलावबाट संक्रमणकालीन न्यायका बाँकी कार्य पूरा गर्न अप्ठ्यारो पर्ने आशंका गर्न थालिएको छ, त्यस्तै हुने त होइन ?

शान्ति प्रक्रिया सबै राजनीतिक दल तथा मुलुककै साझा चासो, चिन्ता र सरोकारको विषय हो । त्यसैले शान्ति प्रक्रियाका बाँकी काम पूरा गर्न सबै पक्ष प्रतिबद्ध हुनुपर्छ। पुरानो गठबन्धनमा शान्ति प्रक्रियालाई चाँडै तार्किक निष्कर्षमा पुर्‍याउने सहमति भएको थियो। हिजोको प्रमुख प्रतिपक्ष सत्तामा आउँदै गर्दा त्यसले अझै सहयोग पुग्छ भन्ने मलाई लाग्छ। यो राजनीतिक घटनाक्रमले शान्ति प्रक्रियालाई टुंग्याउन मद्दत गर्नेछ, तर कतिपयलाई वाम गठबन्धन मन नपरेर यसलाई भत्काउने कोसिस पनि हुन सक्छ। हाम्रा राजनीतिक दल तथा शीर्ष नेतृत्व आफैैँमा बढो परिपक्व छन्, जिम्मेवार छन्।
 
विगतमा मौलिक ढंगले शान्ति प्रक्रियाका महत्वपूर्ण प्रक्रिया सम्पन्न हुँदै आएका हुन्। अब यसका बाँकी कार्यभार पनि सत्तापक्ष र प्रतिपक्ष मिलेरै पूरा गर्नेछन्। नेपालमा सधैँका निम्ति शान्ति सुनिश्चित गर्दै त्यसलाई दिगो बनाउने र त्यसैको जगबाट लोकतन्त्रलाई सुदृढ बनाउँदै समाजवादतर्फ जान सबै दल जिम्मेवारीपूर्वक लाग्नेछन्, लाग्नुपर्छ।
 
प्रश्नः मुलुकलाई राजनीतिक रूपमा स्थायित्व दिन माओवादीले भूमिका खेल्न सकेन भन्ने टिप्पणीलाई कसरी हेर्नुहुन्छ ?

गतिशीलता र अस्थिरतालाई मानिसले छुट्याउन नसकेर यसो भनिएको हो। माओवादी नै नेपालको सबैभन्दा गतिशील पार्टी हो। यही पार्टीको गतिशीलताले देशमा हालसम्मका ठूला–ठूला परिवर्तन भएका छन्। गणतन्त्र स्थापना भएको छ। राजनीतिक धार अग्रगतिमा बढेको छ। दिगो बनाउन माओवादीले निरन्तर नेतृत्वदायी भूमिका खेलेको छ। गतिशीलतालाई अस्थितरता देख्नु भ्रम हो। रासस