कपिलवस्तुबाट काठमाडौं आउँदै गरेको यात्रुवाहक बस त्रिशूली नदीमा खसेको छ । बुधबार बिहान ५ बजेको समयमा लु.२ख२१२१ नम्बरको यात्रुवाहक बस धादिङको गजुरी गाउँपालिका– ५ घाटबेँसीबाट नदीमा खस्दा चारजनाको मृत्यु भएको छ भने ३३ जनाको जीवितै उद्धार गरिएको छ ।
बसकाे गति अनियन्त्रित भएर नदीमा खसेको हुन सक्ने प्रहरीले जनाएको छ । १३ जनालाई सशस्त्र प्रहरी बल नेपाल विपत् व्यवस्थापन सुरक्षा बेस आमदघाटबाट डिएसपीको कमान्डमा खटिएको टोलीले जीवितै उद्धार गरेको छ । जीवितै उद्धार गरिएकामध्ये १८ जनालाई गजुरी अस्पताल पठाइएको प्रहरीले जनाएको छ ।
उक्त स्थानमा विपत् व्यवस्थापन तालिम शिक्षालय कुरिनटारबाट इन्स्पेक्टरको कमान्डमा ६ जना गोताखोरसहित २० जनाको टोली खटिएको छ । घटनाबारे थप विवरण आउन बाँकी छ ।