सावित्रा भण्डारीले नेपाली राष्ट्रिय महिला फुटबल टोलीबाट ५० अन्तर्राष्ट्रिय गोल पूरा गरेकी छिन् । साउदी अरेबियाको रियादमा चलिरहेको वाफ महिला च्याम्पियनसिप २०२४ मा बिहीबार इराकविरुद्ध पाँच गोल गरेसँगै सावित्राले नेपालको अन्तर्राष्ट्रिय फुटबल करिअरमा दुर्लभ कीर्तिमान बनाएकी हुन् । नेपालको फुटबल इतिहासमा ५०अन्तर्राष्ट्रिय गोल गर्ने उनी पहिलो नेपाली खेलाडी हुन् । पुरुष फुटबलमा हरि खड्का र निराजन रायमाझीले सर्वाधिक १३ गोल गरेका छन् ।
सावित्राले इराकविरुद्ध ३७ मिनेटभित्र ह्याट्रिक पूरा गरेकी हुन् । सन् २०१४ मा पाकिस्तानमा भएको साफ महिला च्याम्पियनसिपबाट सावित्राले राष्ट्रिय टोलीमा डेब्यु गरेकी थिइन् । १० वर्षको यात्रामा उनले नेपाली राष्ट्रिय महिला टोलीबाट पाँच अन्तर्राष्ट्रिय ह्याट्रिक गरेकी छिन् । सावित्राले नेपाली फुटबलमा प्राप्त ऐतिहासिक सफलतापछि धेरै खुसी भएको बताएकी छिन् । ‘म धेरै खुसी छु । सबै साथीको सहयोगले गोल भएको छ । मलाई समर्थन गर्ने सबैजनालाई धेरै धन्यवाद,’ ५० गोल पूरा गरेपछि साउदी अरेबियाबाट सावित्राले भनिन् । अहिले उनी युरोपियन लिगमा आबद्ध छिन् ।
फ्रान्सको फ्रेन्च लिग क्लब अन एभान्ट गुइङगाम्पमा आबद्ध हुने उनी पहिलो नेपाली खेलाडीसमेत हुन् । वाफ महिला च्याम्पियनसिपमा उनले पहिलो खेलमा सिरियाविरुद्ध एक गोल गरेकी थिइन् । फिफा वरीयताविहीन इराकविरुद्ध सावित्राले पाँच गोल पूरा गरेकी थिइन् । सावित्राले खेलको १४, १६, ३६, ४५ र ८०औँ मिनेटमा गोल गर्न सफल भइन् ।
नेपाल सेमिफाइनलमा
प्रतियोगितामा लगातार दोस्रो जितसँगै नेपाल एक खेलअघि नै सेमिफाइनलमा पुगेको छ । नेपालले शनिबार प्यालेस्टाइनसँग समूह ‘बी’को अन्तिम खेल खेल्नेछ । नेपाल लगातार दुई खेल जित्दै ६ अंक जोडेर शीर्ष स्थानमा छ । गोलरक्षक एन्जिला तुम्बाप्पो सुब्बाको कप्तानीमा नेपालले पहिलो खेलमा सिरियालाई ४–१ ले हराएको थियो । यही खेलबाट चन्द्रा भण्डारी र सविना चौधरीले राष्ट्रिय टोलीबाट डेब्यु गरेका थिए । प्रशिक्षक राजेन्द्र तामाङले चन्द्रालाई रेखा पौडेलको स्थानमा डेब्यु गराउँदा सविनालाई हिराकुमारी भुजेलको स्थानमा मैदान छिराएका हुन् । महिला फुटबलमा नेपाल दशपटक अन्तर्राष्ट्रिय फुटबलको फाइनल पुगे पनि उपाधिविहीन हुँदै आएको छ । यसपटक महिला फुटबलमा कमजोर मानिएको मध्यपूर्वी क्षेत्रमा नेपाल ऐतिहासिक उपाधि जित्ने लक्ष्यमा छ ।
पहिलो हाफमै ह्याट्रिक
इराकविरुद्ध सावित्राले खेलको १४औँ मिनेटमा पहिलो गोल गरिन् । दीपा शाहीले मध्यभागबाट काउन्टर अट्याकमा उपलब्ध गराएको बलमा सावित्राले इराकका तीन खेलाडीलाई बिट गर्दै सहजै गोल गरिन् । खेलको १६औँ मिनेटमा सावित्राले दोस्रो गोल गरिन् । इराककी रक्षक दिरिन मुलाबाकरबाट बल खोस्दै उनले पहिलो बारबाट सहज फिनिसिङ गरिन् । खेलको ३७औँ मिनेटमा पूजा रानाले दायाँ भागबाट मिलाएको बललाई उनले हेडिङ गोल गर्दै ह्याट्रिक पूरा गर्न सफल भइन् । खेलको ४४औँ मिनेटमा सावित्राले चौथो गोल गरिन् । गोलरक्षक जाहरा अल सादेईको रिबाउन्ड बलमा उनले एक्रोब्याटिक गोल गरिन् । मध्यान्तरपछि प्रिती राईले मिलाएको बललाई सावित्राले बक्सबाहिरबाट व्यक्तिगत पाँचौँ गोल गरेकी हुन् ।