Skip This
रास्वपा अहिले विदेश यात्रामा होमिएको छ । खासमा तपाईंहरूको प्रवास रणनीति के हो ?
हाम्रो पार्टीको विधानमै प्रवास नेपाली सम्पर्क विभाग रहने व्यवस्था छ । यसको नेतृत्व मैले नै गरिरहेको छु । विविध कारणले बिदेसिनुभएका नेपालीसँग सम्पर्क/समन्वय गरेर उहाँहरूको ज्ञान, सिप र पुँजी स्वदेश भित्र्याउनेबारे हामीले बहस चलाइरहेका छौँ । गएको निर्वाचनमा प्रवासी नेपालीको ठुलो सहयोग प्राप्त भएका कारण पार्टी सभापतिसहितका नेता उहाँहरूलाई धन्यवाद दिन र संगठन विस्तार गर्न विदेश यात्रामा हुनुहुन्छ ।
तपाईंहरूको ‘मिसन ०८४’ अभियानलाई सफल बनाउन प्रवासका मतदाताको भूमिका कस्तो हुन सक्छ ?
हामीले हाम्रो वाचापत्रमै प्रवासमा रहेका नेपालीको मताधिकारको विषय उठाएका छौँ । पार्टी स्थापनादेखि नै विदेशमा रहेका नेपालीले मतदान गर्न पाउनुपर्छ भन्ने मुद्दा उठाउँदै आएका छौँ । अहिले निर्वाचन आयोगले पनि त्यसैअनुसार ‘डकुमेन्टेसन’ अगाडि बढाइरहेको छ । उहाँहरूको मताधिकार सुरक्षित भएपछि मिसन ८४ सफल बनाउन अहम् भूमिका हुने नै भयो ।
रास्वपाले बिदेसिएका नेपालीलाई स्वदेश फर्काउने घोषणा गरेको थियो । त्यो अभियान कहाँ पुग्यो ?
अभियान जारी छ । हामीले नेपालमा रोजगारी दिन चाहने १० कम्पनीसँगको सहकार्यमा बिदेसिएका नेपालीका लागि ‘भ्याकेन्सी’ नै खुलाएका थियौँ । त्यसअनुसार आएका निवेदनलाई ‘सर्टलिस्टिङ’ गर्ने काम भइरहेको छ । सभापतिको विदेश भ्रमण सकिनासाथ कति फर्किए र रोजगारीसँग जोडिए, त्यसको विवरण सार्वजनिक हुनेछ । रास्वपाले विदेशमा रहेका नेपालीलाई स्वदेशमै काम गर्ने माहोल सिर्जना गर्न समन्वय गरिरहेको छ ।
