फ्रन्ट पेज प्रिन्ट संस्करण

सुनसम्बन्धी जाँचबुझ आयोगले सिआइबीसँग माग्यो सबै अनुसन्धान प्रतिवेदन

सुनको अवैध पैठारी नियन्त्रणसम्बन्धी गठित जाँचबुझ आयोगले नेपाल प्रहरीसँग त्रिभुवन अन्तर्राष्ट्रिय विमानस्थलबाट तस्करी भई आएको सुनसम्बन्धी अनुसन्धान प्रतिवेदन मागेको छ । आयोगले मोटरसाइकल/स्कुटरको ब्रेकसुमार्फत भएको ६०.७१६ केजी र विद्युतीय चुरोट (भेप)मा लुकाई तस्करी गरिएको साढे नौ किलो सुनको अनुसन्धान प्रतिवेदन माग गरेको हो । 

आयोगले शुक्रबार नै प्रहरी प्रधान कार्यालयलाई घटनासँग सम्बन्धित प्रतिवेदन उपलब्ध गराउन पत्र पठाएको छ । प्रधान कार्यालयले आयोगको पत्र मातहतको केन्द्रीय अनुसन्धान ब्युरो (सिआइबी)मा मंगलबार नै पठाइसकेको छ । सुन तस्करीसम्बन्धी दुवै घटनाको सिआइबीले अनुसन्धान गरिरहेको छ । 

सिआइबी अनुसन्धानमा अध्ययन गर्न आयोगले प्रतिवेदन मागेको जाँचबुझ आयोग सदस्य तथा नेपाल प्रहरीका पूर्वएआइजी सहकुल थापाले बताए । ‘आयोगले आफ्नो काम सुरु गरिसकेको छ । सोहीअनुसार घटनासँग सम्बन्धित यसअघि भएको अनुसन्धान अध्ययन गर्नुपर्ने भयो । सोही प्रयोजनका लागि नेपाल प्रहरीसँग सुन तस्करीसँग सम्बन्धित दुवै घटनाको अनुसन्धान प्रतिवेदन माग गरिएको हो,’ उनले भने । 

जाँचबुझ आयोग सदस्य तथा नेपाल प्रहरीका पूर्वएआइजी सहकुल थापा भन्छन्–
आयोगले आफ्नो काम सुरु गरिसकेको छ । सोहीअनुसार घटनासँग सम्बन्धित यसअघि भएको अनुसन्धान अध्ययन गर्नुपर्ने भयो । सोही प्रयोजनका लागि नेपाल प्रहरीसँग सुन तस्करीसँग सम्बन्धित दुवै घटनाको अनुसन्धान प्रतिवेदन माग गरिएको हो । 

भेप तथा मोटरसाइकल/स्कुटरको ब्रेकसुमार्फत गरिएको सुन तस्करी जाँचबुझ गर्न सरकारले गत १४ असोजमा आयोग गठन गर्ने निर्णय गरेको थियो । सोही निर्णयअनुसार गठित आयोगले सिंहदरबार पुरानो गृह मन्त्रालयस्थित भवनमा कार्यालय राखी कारबाही प्रक्रिया अघि बढाएको छ । गत बुधबार बसेको आयोगको पहिलो बैठकले सुन तस्करीसँग सम्बन्धित तथ्यगत सूचना एवं सुझाव प्राप्त गर्न सञ्चारमाध्यममार्फत सूचना सार्वजनिक गर्ने निर्णय गरेको थियो । निर्णयअनुसार घटनासँग सम्बन्धित सूचना एवं सुझाव १६ कात्तिकसम्म पेस गर्न सकिनेछ । 

आयोगका अध्यक्ष तथा पूर्वन्यायाधीश डिल्लीराज आचार्यले भेप तथा ब्रेकसुमार्फत गरिएको सुन तस्करीसँग जोडिएको जोकोहीलाई पनि आयोगले पक्राउ गर्ने, हिरासतमा राख्ने र आवश्यक अनुसन्धान गरिने बताएका छन् । घटनासँग जोडिएका जोकोहीलाई पक्राउ गर्ने अधिकार आयोगलाई प्राप्त भएको हुँदा जाँचबुझ जरोसम्म पुगेर हुने उनको भनाइ छ । 

गत १० पुसमा फ्लाई दुबईको जहाज हुँदै अन्तर्राष्ट्रिय विमानस्थल झरेका चिनियाँ नागरिक ली हानसोङ ई–सिगरेटसहित पक्राउ परे । अनुसन्धानपछि भेपभित्र नौ किलो सुन रहेको खुलेका थियो । उक्त घटनामा माओवादी उपाध्यक्ष तथा पूर्वसभामुख कृष्णबहादुर महरा र उनका छोरा राहुल महरा मुछिएका थिए । 

घटनाको अनुसन्धानका क्रममा सिआइबीले राहुललाई पक्राउ गरेको थियो । उनीसहित घटनामा संलग्न चारजनाविरुद्ध सरकारी वकिल कार्यालय काठमाडौंले मुद्दा चलाइसकेको छ । कृष्णबहादुरविरुद्ध भने मुद्दा चलाउन नपर्ने सिआइबीको निष्कर्ष छ । 

त्यस्तै, गत २ साउनमा त्रिभुवन अन्तर्राष्ट्रिय विमानस्थलस्थित भन्सारको जाँचपास पार गरेर बाहिरिएको ६०.७१६ किलो सुन राजस्व अनुसन्धान विभागले पक्राउ गरेको थियो । उक्त सुन मोटरसाइकल र स्कुटरको ‘बे्रकसु’मा लुकाएर हङकङबाट क्याथे प्यासिफिकको जहाज हुँदै नेपाल ल्याइएको थियो । जसको अनुसन्धान पछि सिआइबीले गरेको थियो । २९ जनलाई प्रतिवादी बनाइएको उक्त मुद्दामा अहिले जिल्ला अदालत काठमाडौंमा बहस जारी छ । 

सरकारबाट गठित आयोगले सिआइबीबाट भएको अनुसन्धानलाई पनि जाँचबुझ गर्ने र कैफियत देखिएको खण्डमा कारबाहीका लागि सिफारिस गर्नेछ । जाँचबुझका क्रममा नेपालसहित घटना जोडिएका अन्य मुलुकमा समेत जान सकिने आयोगका अध्यक्ष आचार्यले बताएका छन् । 

सिआइबीका अनुसार हङकङबाट नेपाल हुँदै भारतमा सुन तस्करी गर्ने गिरोहका मुख्य नाइके चिनियाँ नागरिक वाङ डाओजिन हुन् । सिचुनाव प्रान्तका उनी कारोबारका लागि पटक–पटक नेपाल आउने–जाने गरेको देखिन्छ । ६०.७१६ किलो सुन बरामद हुनु केही दिनअघि मात्रै उनी नेपाल आएका थिए ।

कारोबारका लागि उनी हङकङ बस्ने गर्छन् । उनको कारोबारमा जेनपेङ योङछिन, झोङ जिङछुन, लिन र लीसहित अन्य तीनजना साझेदार छन् । उनीहरू हङकङमा नै बस्छन् । 

सुन कारोबारका लागि उनीहरूले हङकङमा ताल्मुड, डोङगुन सुता ट्रान्सपोर्टेसन, जिनमेन फेङटोन ट्रान्सपोर्टेसनलगायतका १० कम्पनी खडा गरेका छन् । तिनै कम्पनीमार्फत उनीहरूले तस्करीको सुन नेपाल पठाउँदै आएका छन् । घटना अनुसन्धानमा संलग्न एसपी कृष्ण पँगेनीले तस्करीको सुुन नेपाल पठाउन तस्करले हङकङमा विभिन्न १० कम्पनी खोलेको बताए ।

आठ अर्ब ५५ करोड बिगो दाबी गर्दै मुद्दा दायर
विद्युतीय चुरोट (भेप)मा लुकाएर सुन तस्करी गरेको आरोपमा राहुल महरासहित चारजनाविरुद्ध काठमाडौं जिल्ला अदालतमा मुद्दा दर्ता भएको छ । राहुलसहित सर्लाही बागमती नपा– ५ का लोकेन्द्रकुमार पौडेल, तिब्बती मूलका बेल्जियम नागरिक दावा छिरिङ र बौद्ध बस्ने निमा गुरुङलाई मुद्दामा प्रतिवादी बनाइएको छ । उनीहरूविरुद्ध संगठित अपराध, भन्सार छलीलगायत कसुर गरेको आरोपमा मुद्दा दायर गरिएको जिल्ला सरकारी वकिल कार्यालयले जनाएको छ । दावाविरुद्ध बढीमा पाँच वर्ष कैद सजाय र आठ अर्ब ५५ करोड २८ लाख तीन सय ७४ रुपैयाँ बिगो दाबी गरिएको छ । त्यस्तै, राहुल, लोकेन्द्रकुमार र निमाविरुद्ध डेड वर्ष कैद सजाय माग दाबी गरिएको छ ।