बुधबार बिहान ९ बजेदेखि उम्मेदवारी दर्ता, बिहीबार मतदान

एमाले बागमती प्रदेशको नयाँ नेतृत्व छनोटका लागि बुधबार बिहानैबाट निर्वाचन प्रक्रियाअगाडि बढाउने गरी कार्यतालिका प्रकाशित भएको छ। 

बिहान ९ देखि ११ बजेभित्र उम्मेदवारी मनोनयन र बिहीबार बिहान मतदान गर्ने निर्वाचन कार्यतालिका रहेको स्थायी समिति सदस्य शेरबहादुर तामाङले जानकारी दिए।

निर्वाचन कार्यक्रमअन्तर्गत पार्टी केन्द्रीय कार्यालय च्यासलमा आठ बजे मतदाता नामावली प्रकाशन हुनेछ भने ९ बजे अन्तिम नामावली टाँसिनेछ। 

त्यसपछि ९ देखि ११ बजेसम्म उम्मेदवारी दर्ता, ४ बजे उम्मेदवारहरूको नामावली प्रकाशन र बिहीबार बिहानबाट मतदान सुरु हुनेछ। 

प्रज्ञा भवन कमलादीमा सम्पन्न राजनीतिक तथा सांगठनिक प्रतिवेदनमाथि प्रतिनिधिहरूका तर्फबाट हस्त पण्डित, आनन्दकुमार श्रेष्ठ, बद्री मैनाली, कमल पाठक, एकालाल श्रेष्ठ, बेलिमाया घले र रमेश पौडेलले समूहमा आएका सुझाव प्रस्तुत गरेका थिए। अधिवेशनको बन्दसत्रले प्रतिवेदन पारित गरेको छ।