- वि.सं २o८१ बैशाख २३ आइतबार
सरकार र आन्दोलनरत नेपाल शिक्षक महासंघका प्रतिनिधिबीचको अनौपचारिक वार्ता सकिएको छ ।
भोलि बिहान आठ बजे औपचारिक वार्ता गर्ने गरी आजको बैठक सकिएको शिक्षामन्त्री अशोककुमार राईले जानकारी दिए ।
वार्ताका लागि सरकारले शिक्षक महासंघलाई औपचारिक पत्राचार नगरेकाले आजको बैठकलाई अनौपचारिक मानिएको मन्त्री राईको भनाइ छ । उनले बैठक सकारात्मक र निश्कर्षनजिक रहेको पनि बताए ।
देशभर सामुदायिक विद्यालयमा पठनपाठन रोकेर आन्दोलनमा उत्रेका शिक्षक र सरकारबीच आजै पटकपटक अनौपचारिक वार्ता भएका थिए । तर, कुनै पनि वार्ता निश्कर्षमा पुग्न सकेनन् ।
वार्तामा सरकारका तर्फबाट उपप्रधानमन्त्री एवं गृहमन्त्री नारायणकाजी श्रेष्ठ, अर्थमन्त्री डा. प्रकाशशरण महत, शिक्षा, विज्ञान तथा प्रविधिमन्त्री अशोक राई, कानूनमन्त्री धनराज गुरुङ, संचार मन्त्री रेखा शर्मा र सम्बन्धित मन्त्रालयका सचिव सहभागी थिए ।
महासंघको तर्फबाट अध्यक्ष कमला तुलाधर, महासचिव लक्ष्मीकिशोर सुवेदी, आन्दोलन परिचालन समितिकी संयोजक नानुमाया पराजुली, नेपाल शिक्षक संघ, नेपाल राष्ट्रिय शिक्षक संगठन र एकीकृत अखिल नेपाल शिक्षक संगठनका प्रतिनिधि सहभागी थिए ।
