- वि.सं २o८१ बैशाख १९ बुधबार
मेलम्चीकै संरचनाबाट पानी वितरण
बर्खाका कारण अवरुद्ध भएको मेलम्ची बाँध मर्मत गरेर असोजमा खानेपानी ल्याउने तयारी भइरहेको मेलम्ची खानेपानी आयोजनाले जनाएको छ । मेलम्ची खानेपानीका परियोजना निर्देशक राजेन्द्र सापकोटाले मेलम्चीले नै तयार पारेको संरचनाबाट उपत्यकामा खानेपानी वितरण हुँदै आइरहेको बताए ।
आकासे पानी पर्न कम भएपछि मेलम्चीको पानी ल्याउने तयारी गरिने उनले बताए । उनले भने, ‘अहिले उपत्यकाआसपासका मूलको पानी मेलम्चीको खानेपानी संरचनाबाट वितरण भइरहेको छ । पानी पर्न कम भएपछि मेलम्चीको पानी ल्याउने प्रयत्न गर्नेछौँ ।’ उनका अनुसार हाल उपत्यकामा खानेपानीको मिटर जडानको काम चलिरहेको छ । २० हजारभन्दा बढी मिटर जडान भइसकेको उनले बताए ।
ढुंगेधाराले पनि उपत्यकामा बर्खामा पानीको अभाव पूर्ति गर्न ठूलो भूमिका खेल्ने गरेको छ । हाल उपत्यकामा पाँच सय ७३ वटा ढुंगेधारा छन् । त्यसमध्ये झन्डै दुई सयवटामा बर्खाका वेलामा पानी आउँछ । करिब १६ वटामा हिउँदमा पनि पानी आउँछ । तीन सयभन्दा बढी सुक्खा छन् भने करिब ३० वटा लोप भइसके । पानी आउने ढुंगेधारामा मूल र कुवा जोडिएको पाइन्छ ।
